Paw ki dak ki shin ba bha haka Behdeiñkhlam ong u Langdoh ka Raij Mukhla

Syllad | The Rising MeghalayaAugust 26, 2020

U Langdoh jong ka Seinraij Mukhla, u Ma Wanbha Lyngdoh ula ong “Ki dak ki shin haka Behdeiñkhlam ki long kiba bha bad ngi ngeit skhem ba jingpang khlam COVID-19 kan jem ha baroh kawei ka pyrthei.”

Ula ong ba mynta u snem kila pyndep iaka lehniam Behdeiñkhlam da ka jingbud ryntih iaki jingbthah jong ka sorkar ban iada na ka khlam COVID-19. “Ngi ngeit ruh ba kane ka Behdeiñkhlam watla ki riewngeit ne ki khun Niamtre kim shym la ioh ka lad ban shim bynta kumba ju long, hynrei ngi la ai ka nguh ka dem ha ki blei ki syiem ba kin beh iaka sniew ka smeh bad ba kane ka pyrthei kan ioh biang sa shisien iaka koit ka khiah bad ka suk ka sain,” ong u Langdoh.

Ka lehniam Behdeiñkhlam ka Seinraij Mukhla kaba dei ka Behdeiñkhlam kaba khatduh eh kaba la pyndep manla u snem ha Rilum Jaintia naduh ka 22 tarik haduh 25 tarik kaba la pynkut iaka kala long kaba iaid beit iaid ryntih.

Ha kane sngi pynkut iaka lehniam la sdang naduh ka por mynstep da ka jingkynting dieng khlam, ka jingshad ha manla ki thliew iing.

Haka nohphai sngi la wanrah shi jaka iaki lai tylli ki rong ha madan Slot Masi nangta pat la pynhiar iaki sha biar ne ka pung kyntang. La don ruh ka jingpynkhein iaki diengkhlam.

Hashwa ban pynhiar iaki rong, la pynhiar shwa ia ki 3 tylli ki deinkhlam ba la pynieng ha madan Tihkhyndaw bad Madan Ryngkaw bad hadien ba la pynhiar iaki rong ryngkat ka jingsawa ka bom bad kynud ka bhuri.

Hadien bala dep ban pynshad iaki rong la pynkut da kaba la bret pat kum ka dak ban pynkut iaka Behdeiñkhlam.