Paw ki sap ki phong ba nylla ki samla pule ka Jowai Polytechnic

Syllad | The Rising MeghalayaNovember 2, 2023

Wat la kiba bun ki samla pule ki iabeh ban leit pule sha ki skul ne ki jaka hikai ba pawnam kiba don haka Ri, hynrei mynta la lah ban ong ba ki jaka pule jaka hikai ha Jylla ruh kim duna shuh haba ianujor bad kiwei pat ha kaliang ban wanrah iaka jingsngewkhem u/ka samla ban ieng hala ki jong ki kjat.

Kane kala paw pyrthei haka Technophilia 2023- An Exhibition Showcase of Art Culture and Innovation ne kata ka rynsan ba ki samla pule ha ka liang ki sap shna jingshna, kolshor bad bad halor ki jingshna katkum ka jingstad saian haka 1 tarik Naiwieng.

Ka Jowai Polytechnic kala pynlong ia kane ka prokram Technophilia ban plie lad iaki samla kiba pule haka line Automobile Engineering, Costume Design & Garment Technology bad ka Architectural Assistantship ban pynpaw iaka sap ka phong jong ki. Ha kane ka sngi la sakhi ba ki samla pule ka Jowai Polytechnic kila lah ha ka ban shna wat iaka electric bicycle bad iaka Electric bike ba lai shaka bad saw shaka.

Ha kane ka prokram la ia don lang ruh ka ADC, ka Kong D V Lyngdoh MCS kum ka Kongsan kaba ha ka jingkren ka la pynpaw ka jingsngew kmen ban ioh ia kane ka lad ban iashim bynta lang ha kane ka prokram.

Ka Kong Lyngdoh ka la ban jur halor ka jingdonkam ban bteng ia ki jingpule kiba shakhmat, kata da kaba ong ym don pud ha kaba iadei bad ka jingwad ia ka jingstad,  ki jingtip bad ka jingjop.

Nalor kata ka pynshlur ruh ia ki nongwan iashim bynta ba kin pyrkhat janai khnang ban lah ban kiew shaphrang ha ki sap ki phong kiba ki don lyngba ka lynti jong ka jingtrei shitom bad ka jingiatreilang.

Na ka liang u Principal jong ka institute, u Bah SP Basaiawmoit ula pynpaw ba kane ka dei ka sien kaba nyngkong eh ba kane ka jaka pule ka la lah ban pynlong ia kaba kum kane ka prokram kaba kongsan, kata ka jingthmu ka long ban kyntiew ia ki sap ki phong kiba rieh jong ki samla pule ha ka liang ka Automobile, Architecture bad Costume Design bad Garment Technology department.

Hadien kane la ioh ban sam ia ki khusnam sha ki samla pule na ki laitylli ki department.

Ki nongjop ha ka Automobile Engineering kilong; ha ka kyrdan ba nyngkong -Electric bicycle – na ka 2023 batch, ba ar – Electric bike – 2019  batch bad ba lai – Electric 3 wheel na ka 2022 batch.

Katba ha ka Costume Design & Garment Technology ia ka kyrdan ba nyngkong la ioh rah da ka Mihsalan O-iaki Dkhar, bad ar da ka Rinayoodaka Dkhar bad ba lai da ka Sowaka Dkhar.

Haka Architectural Assistantship ia ka kyrdan ba nyngkong la jop da u Andrew W. Lamin, ba ar Deitre Laloo bad ba lai da u Mewanshanbok Niangti.