Paw kyrteng u ma Simon Siangshai uba la khlad ban kyrshan iaka public hearing ka Star Cement: KSU

Syllad | The Rising MeghalayaJuly 3, 2021

Ka KSU kala kam ba u ma Simon Siangshai, u MLA barim bad uba la khlad noh na kane ka pyrthei u kyrshan iaka Public Hearing kaba la khot pynlong da ka MSPCB haka 21/11/2020 na ka bynta ioh khlong mawshun ka Star Cement na Brishyrnot.

U president KSU Narpuh Circle KS Suchiang, ula ong haka jubab RTI kaba ka KSU kala ioh na ophis u Deputy Commissioner kala lap ba paw kyrteng u ma Simon Siangshai, u MLA barim uba la khlad haka 11/9/2020 ba u kyrshan iaka jingthmu khlong mawshun ka Star Cement ha Brishyrnot.

Ula ong ba ia kane ka RTI kila pan hadien ba ka Star Cement kala kam ba kala ioh Environmental Clearance na ka Ministry of Environment, Forest and Climate Change na ka bynta ka par Mawshun kaba heh 42.051 Hectare kaba don ha ka shnong Brishyrnot, East Jaintia Hills District.

“Ngi la kyndit ban iohi iaka kyrteng u MLA barim ma Simon Siangshai uba la khlad kumno u kyrshan ia katei ka Public Hearing kaba la pynpep haduh lai sien hadien ka jingpyrshah kiba bun ki sengbhalang bad ka ki paidbah,” la ong u KS Suchiang bad ula bynrap ba na ki 280 ngut tang khyndiat eh kiba pyrshah bad bun kiba kyrshan.

“Ka jubab RTI kaba ngi ioh ruh kaba i thamula bha ha kaba kiba kyrshan don kiba ym don kyrteng bad la shu soi kyrteng. Nalor kata la kynnoh ba kiba pyrshah ia kane ka public hearing ban khlong mawshun ka Star Cement ha katei ka jaka ki dei kiba nabar bad kiba ym don jingkitkhlieh iaka roi ka par bad kim don jingkhlieh ruh iaka jingshah ktah ka mariang,” la ong u KS Suchiang.

Ka KSU kala ong ba katkum ka jubab RTI la ong shuh shuh ba kiba pyrshah ia katei ka public hearing kidei kiba shah thong pisa bad kiba bam pisa bad ka KSU kala kynthoh mano ba bam pisa kiba kyrshan ne kiba pyrshah?

Ka KSU kala suba sniew ba don kaei kaei sha lyndet bad ka KSU kala byrthen ban kan nym shong kli kti ban iakhun pyndam iaka Environmental Clearance ka Star Cement.