Paw pyrthei ba lehbeijot u kpa ïala ka khun hadien 14 snem, ioh khun iwei khlad iwei ha West Jaintia Hills

Syllad | The Rising MeghalayaOctober 18, 2021

Ka long ka jingjia sngewsih ia kawei ka longkmie kaba la hap ban set halade iaka jingshah thombor bad lehbeiñ hala u jong u kpa uba lehbeijot haduh 14 snem. Kane ka longkmie kala ioh ruh iwei i khun bad ka ri sumar ia i haduh mynta bad iwei ila khlad noh na kane ka pyrthei.

Kane ka jingjia kala jia ha kawei ka shnong kaba hap hapoh ka Nartiang Police Station, West Jaintia Hills District.

Kane ka jingjjia shah lehbeijot kane ka longkmie kala jia naduh ba ka don tang haka rta kaba 13 snem ha u snem 2007, hynrei dang mynta kala nud ban iathuh ia kaei kaba jia hadien ba une u kpa ula wan thombor biang iaka haka iing sah jong ka kaba kala sah kham kyndong nala ka shnong.

Kane ka longkmie kala ujor iaka jingmudui ejahar dalade hakhmat ki pulit jong ka Nartiang Police Station haka 16 tarik une u bnai Risaw bad ka jingtohkit kala iaid shakhmat.

Katkum ka jingujor kala kynnoh ba ia kane ka kam u kpa jong ka ula leh haka por ba dang dap 13 snem ka rta ha u snem 2007 ha kawei ka jaka khlaw harud nong, hynrei kam nud ban iathuh ia kaei kaba la jia pyrshah iaka ha kiba haiing hasem namar ba byrngem pyniap. ia ka bad ia baroh kiba haiing hasem jong ka.

“Nga la pun khun I wei nala u jong u kpa hadien kane ka jingjia ha u snem 2007 bad haduh mynta ia ine i khun nga la ri sumar ia I. Hynrei ha kaba ar katba ki snem ki por ki dang iaid khlem poi pyrkhat ha u snem 2016 u kpa jong nga ula thombor biang ia nga bad leh ia kane ka sang pyrshah ia nga bad nga la pun biang ia i khun iba ar hynrei sniewbok ila khlad noh haka por ba i don ar snem ka rta,” ong kane ka longkmie.

Kane ka longkmie kala ong “Katba dang iaid ki por u kpa u byrngem byrsit ia nga bad haduh kane ka khyllipmat kiba ha iing hasem kila sdang iohi iaka jingphylla bad kila wad bniah bad pyrshang ban kylli na nga, hynrei haka por ba nga la hap ban sah marwei ha ïing, namar kiba ha iing hasem jong nga ki phah sah ia nga marwei lem bad I khun haka 27 tarik July (Naitung) 2021, u kpa jong nga ula wan kyrsiew iing biang ia nga haka por mynmiet bad nga la kut jingmut ba ngan ym plie shuh iaka iing hynrei u kyrdem iaka iing ka sem jong nga bad ngam banse ban phone sha kiba ha ïing ban iathuh iaki mar kumta kila ia wan bad ka nga la iathuh lut ia kaei kaba jia.”

“Nga la kut jingmut ban ujor pyrshah ia u (kpa) halor kane ka kam thombor jong u pyrshah ia nga sha ka bor jong ka aiñ, kumta nga rai ban ujor pyrshah ia u sha phi kiba dei khmih iaka aiñ jingiada bad ia ngi ki kynthei khynnah,” la ong kane ka longkmie haka jingmudui ejahar jong ka.

Kane ka longkmie kala pan ka jingiarap naka bor shnong khnang ba kan lait na kino kino ki jingeh kaba ka shnong ruh kala pynpaw iaka jingkloi jong ka ban iarap ia kane ka longkmie ba la ngat ha kane apot bad shah iaka jingeh da ki phew snem.

Haduh bala thoh ia kane ka khubor ym pat ioh kem satia ia une u briew bad ula phet rieh ialade naka bor jong ka aiñ.