Paw pyrthei ka kam khaii beaiñ iaki mrad ba jan duhjait da ka jingioh pyllait iaka Rbai, shah kem lai ngut ki suba nongkhaii

Syllad | The Rising MeghalayaNovember 16, 2020

Ka jingma kaba khraw ka ap iaki mrad khlaw kiba jan duhjait na ka jingkhaii beaiñ na kawei ka jylla sha kawei pat bad kane kala paw pyrthei da ka jingiohkem iaki lai ngut ki suba donkti ban khaii beaiñ bad ioh kurup ruh ia kawei ka Indian Pangolin (kaba la tip kum ka Rbai haka ktien Pnar) bad 1.20 Kg ka snep.

Kane ka mrad khlaw ka dei ki mrad kaba kyrpang bad la pynhap ruh iaki haka kyrdan Schedule I jong ka Wild Life (Protection) Act, 1972.

Ka thymmei khubor kaba thikna ka iathuh ba ka Jaintia Hills Wildlife Division kala ioh jingtip bad ka don ka kynhun jong ki briew kiba shalan ne khaii beaiñ iaki mrad khlaw kiba jan duhjait ha khappud West Jaintia Hills bad West Karbi Anglong, Assam kiba donkti ruh ban pyniap iaki mrad khlaw bad khaii beaiñ iaki met jong kine ki mrad khlaw bad kane tnad kaba dei peit iaki mrad khlaw kala pyntip sha baroh ki nongtrei jong ka ban pynthikna ia kane ka khubor.

Hadien ka jingioh jingtip kaba thikna haka 11 tarik une u bnai Naiwieng kane ka tnad kala ioh jingtip bad pynapshrip ia ka kynhun jong ki briew kiba shalan ne khaii beaiñ ia kine ki mrad na West Karbi Anglong District sha West Jaintia Hills.

Kumta ka kynhun jong ka Jaintia Hills Wildlife Division hapoh ka jingialam ka Divisional Forest Officer kila pynap shrip haka shnong Khanduli. Ka kynhun jong ki Pulit ruh ki iadonlang ban synrang iaki nongtrei ka tnad kam khlaw.

Haka por kumba 2 PM kane ka kynhun kala ioh khubor ba don ka kali rongsaw kaba wan na Hamren. Ki nongtrei ka tnad kam khlaw kila pynsangeh ia kane ka kali bad bat ia ki lai ngut ki briew kiba kynthup ia u Serus Bhoi khun jong u E Shylla, Francis Lamare khun jong u K. Biam bad Arki Lamare khun jong K. Biam. Baroh kine ki lai ngut ki dei kiba naka shnong Namdong-B.

Ioh pyllait iaka mrad kaba pynbha iaka koit ka khiah ka khyndew

Haba khynra ia ka kali la lap ia kawei ka Rbai (Pangolin) kaba dang im bad 1.20 Kg ka snep napoh ka kali jong kine ki lai ngut ki briew.

Mar mar ka tnad kam khlaw (Wildlife Division) kala rah ia kine ki briew sha Jowai. Haka jingtohkit kine ki lai ngut kila phla ba ia kane ka mard bad ka snep klila thied na uwei u briew na Hamren ha West Karbi Anglong District, Assam.

Haka sngi kaba bud, haka 12 tarik une u bnai la rah ia kine ki lai ngut ha khmat ka Chief Judicial Magistrate, Jowai Court.  Ka Chief Judicial Magistrate, Jowai Court kala rai set along iaki hapoh ka judicial custody ban ailad iaka ophis ka Divisional Forest Officer ban tohkit bniah ha Jowai District Jail.

Haba tohkit bniah la lap ksai iaki sakhi satar halor kane ka jingkhaii beaiñ iaki mrad khlaw kaba iarap shuh shuh ban ithuh bad ban iohkem ia kiwei pat ki briew kiba suba donkti ha kaban kem badn pyniap, shalan ne khaii ia kine ki mrad khlaw.

Ia kane ka mrad Pangoliin bad ka snep Pangolin ruh la wanrah sha Jowai bad kane ka Pangolin kala kha khun ruh haka 12 tarik une u bnai. Ia kane ka Pangolin yn sa pyllait ha khlaw Narpuh Wildlife Sanctuary hadien bala ioh jingbit na ka iingbishar.

Kane ka India Pangolin (Manis crassicaudata) kaba la pynhap haka kyrdan Schedule I jong ka Wild Life (Protection) Act, 1972 ka dei kaba ioh ka jingiada kyrpang hapoh ka Ri bad kino kino kiba pyniap ne shalan beaiñ ia kane ka mrad kin ngat haka jingshah pynsaja da kaba shah set phatok kaba ym duna 3 snem kaba lah ruh ban kot haduh 7 snem bad ka kuna kaba ym duna iaka 10 hajar haduh 25 hajar.

Kane ka mrad kadei kaba donkam bha ban pynneh pynsah namar ba ka bam ia ki kynja khniang, ki puit bad kumjuh ruh ia ki dkhiew “Natural Pest Controller and Soil Care Taker”. Ka dei ka jait mrad ki ba iarap ruh ha kaban pynsboh ia ka khyndew. Ki riew ieit mrad kylleng ka pyrthei ki ia leh ban pynsngewthuh ia ki jingdonkam jong kine ki mrad bad ban iada ia ka na ka jingduh jait.