Paw pyrthei ki jingbam u barim ba pyndap bam haba lyngshop ka khlam bad bor mariang ha Cham Cham

Syllad | The Rising MeghalayaDecember 13, 2020

Ka jingiakop shet jingbam kaba la pynlong da ka Society for Urban & Rural Empowerment (SURE) ha ryngkat ka jingiatreilang bad ka Northeast Slow food and Agrobiodiversity (NESFAS) kala pynpaw pyrthei biang ïaki jingbam tynrai u Khasi-Pnar, kiba pyndonkam myn haka por u barim bajah khamtam haka por ba lyngshop ka khlam bad ka bor mariang ba duna ka bam ka dih,.

Kine ki jingbam tynrai kiba la paw pyrthei biang ki kynthup ïaka Ja Shriew bad ka Ja Krai haka jingiakop shet jingbam kaba long haka shnong Cham Cham, East Jaintia Hills District haka sngi Thohdieng ka taiew kaba ladep.

Kane ka jingiakop shet  jingbam ka SURE bad ka NESFAS kadei kum shibynta ka project “No one shall be left behind initiative” kaba ki la hikai ha kylleng ki shnong naka bynta ban hikai iaki nongshong shnong ban bam iaki jingbam tynrai ne ki jingbam kiba lah ban ioh bad mih na kane hi ka thain, kiba long ruh ki jingbam kiba tei bad kiba don ha rukom ki vitamin.

Ka jaidbynriew Khasi Pnar ki dei kiba nang bha ban shet iaki jingbam kiba har rukom bad kine ki jingbam kiba la paw bad kiba bang bha ban bam ki kynthup iaki putharo, pulum, pusaw, pumaloi, jashulia, jakrai j,a riewhadem, jashriew, japhan bad kiwei kiwei ki jingbam.

Haba phai sha kane ka jingiakop shet jingbam ki don haduh 10 ngut kiba iashimbynta. Shuwa ban sdang ka jingshet bam la don ka jingialang kaba lyngkot kaba ka kong Pasqualina Lamare, Project Coordinator SURE ka la ai ka jingbatai shaphang kane ka project bad shaphang ka thong jong kane ka jingiakop. 

Ki nongjop ha kane ka sngi ki kynthup iaka Kong Yona Dkhar bad Kong Mil Dkhar ha kaba ki la shet Ja Shriew. Ka Ja Shriew kadei kaba kongsan namar ba ka don ka vitamin Calcium kaba bha ban bam n aka bynta ki khynnah kumjuh ki longkmie kiba pun ba kha.

Ka Kong Shim Phawa bad Rily Phawa kila wan ba ar ha kaba ki la chet ia ka Ja Krai, kine ki longkmie kila iathuh b aka Ja Krai kadei ka jingbam kaba ki bam haka por mynshuwa khamtam haka por ba duna u khaw u kba ban pyndap iaka jingbam. Nalor kata iaka Jakrai bunsien la bam ruh haka por ka khlam bad ba lyngshop ka bor mariang ba duna bam.

Ka kong Arti Kyndiah bad ka kong Jan Phawa kila wan balai  bad kila shet iaka jajew, pachor bad ka shriew.

La pynbang pynthiang shuh shuh ia kine ki jingbam da ki phang dieng, ktung, dohthli, ki soh, muli, bad ki shyieng toh bad kiwei kiwei.