Pdiang burom iaka Pinki Maring ka nongjop haka 2nd Mrs World International

Syllad | The Rising MeghalayaJuly 2, 2024

Ka longkmie napoh Ri Bhoi District, ka Kong Pinki Maring ka la wanrah ia ka nam ka burom ym tang ia la ka jong ka iing ka sem hynrei ia ka district bad ka Jylla hi baroh kawei lyngba ka jingioh khur ia ka jingjop lyngba ka rynsan iakop thei bhabriew jong ki longkmie ba la tip kum ka “2nd Mrs World International” kaba la kut noh dang shen ha ka nongbah Gurgoan, New Delhi.

Ka Kong Pinki Maring kaba la shah jied ban leit mihkhmat sha katei ka rynsan iakop thei bhabriew hapdeng ki longkmie kiba la wan ban mihkhmat na kylleng ki ri ka pyrthei, ka la iashim bynta ha kane ka jingiakop ba la khot pynlong da ka kynhun jong ka Glamour Gurgaon ia kaba la pynlong hapoh Leela Hotels bad Resort Ambience Mall, Gurgaon.

Kane ka longkmie kaba la mihkhmat ia ka ri India napoh Meghalaya ka la ioh ban rah ia ar tylli ki khusnam ba kyrpang lyngba katei ka rynsan iakop thei bhabriew hapdeng ki longkmie kaba kynthup ia ka “Mrs World Peace” bad ia ka nam “Beautiful Skin.”

Hadien kane ka jingjop ia kane ka longkmie la pdiang sngewbha da kiba haiing hasem, ki rangbah ka Kur Maring, Ri Bhoi District lem bad kiwei kiwei hadien ba la wan poi hapoh ka Kad Liengsuin Lokpriya Gopinath Bordoloi International Airport, Guwahati ha ka 1 tarik u Naitung 2024.

Na ka liang kane ka longkmie lem bad kiba haiing hasem ki la pynpaw ia ka jingkmen kaba khraw halor kane ka jinglah jong ka Pinki Maring ban khur ia kine ki khusnam na katei ka rynsan iakop thei bhabriew  ba la iashim bynta da ki longkmie na kylleng ki ri ka pyrthei, da kaba ki la kyntu ruh ia baroh ki longkmie ne ki samla kiba don ia ka sap kyrpang ha kino kino ki rynsan ba ki dei ban mih shakhmat khlem ka jinglehraiñ khnang ban kheit pat ia u soh jong ka jingjop ha ka jingim jong ki.