Pdiang ka JAC ia ka bai kali thymmai ban kit dewbilat

Syllad | The Rising MeghalayaOctober 17, 2020

Ka Joint Action Committee (JAC) kaba kynthup iaka Jaintia Hills Truck Owners and Driver Association (JHTOA), Meghalaya Truckers Union (MTU) bad ka All Jaintia Hills Clinkers and Cement Association (AJHCCA) da kawei ka sur kala mynjur ban pdiang ia dor thymmai na ka bynta ban kit dewbilat na ki kharkhna.

Ia kane ka rai la shim haka jingialang paidbah ka JAC kaba long ha Phramer haka sngi Saitjain.

Ka tnad Transport haka 25 tarik u bnai Nailur (September) 2020 kala pynmih iaka jingpynbna bad buh dor thymmai iaka dor bai kit dewbilat hadien ka jingialang kaba bun bun sien ban iakren halor kabe ja dor hapdeng JAC, JHCMA bad ka ka sorkar jylla lyngba ka tnad transport bad kumjuh bad u myntri rangbah ka Jylla Conrad K Sangma bad u Myntri transport u ma Sniawbhalang Dhar.

Ka sorkar hadien ba kala shong bishar sani bha ia kane ka kam kala pyndam iaka jingpynbna kaba la pynmih haka 13 Kyllalyngkot 2020 bad kala pynbna bad pynkylla thymmai iaka dor bai kit mar ki trok kata T.7 haduh T.11 na ka T.9 shito kilometre shiton haki surok rong, T.8-12 naka T10 shiton  shi kilometre ha ki surok maw bad T.10-12 naka T.12 shiton shi kilometre ha ki surok khyndew.

U Chairman ka JAC u Nehemayah Tyngkan hadien ka jingialang ula ong ba ka jingialang da kawei ka sur kala pdiang ia kane ka dor thymmai jong ka sorkar bad shen kin iakynduh ia u DTO jong ka East Jaintia Hills ban kyrpad ia u ban pyntreikam noh ia kane ka dor thymmai.

Ula ong ruh ba ka synjuk ki kharkhana dewbilat kila mudui da ka mukotduma pyrshah iaka sorkar jylla halor ka jingpynbna 13 Kyllalyngkot 2020, hynrei ka iingbishar Meghalaya High Court kala pynksan iaka sorkar Jylla bad ka section 67 jong ka Motor vehicle act ka pynkup bor iaka sorkar jylla ban buh iaka dor bai kali naka bynta ban kit mar.

U Nidamon Chullet, president JHTOA, ula pynpaw iaka jingsngewnguh iaka sorkar jylla, ka tnad transport bad ia u Myntri Rangbah ka jylla bad Myntri ka tnad transport kiba shimkhia ban sngap  iaka jingud jingnam ka JAC.

“Ngi la pdiang ia ka rai jong ka sorkar bad ka dor bai kit thymmai bad ki kharkhana dewbilat ruh ki dei ban pyntreikam mardor ia kane ka dor thymmai,” la ong u Nidamon uba ai khublei ruh ia baroh ki seng kiba don haka JAC kiba iatreilang ban iakhih pyrshah iaki kharkhana dewbilat kiba leh kuman ban pyntreikam ia bai kit thymmai ha ki bnai bala dep.