Pdiang ka JHADC ia ki dak A-B Jaiñtia

Syllad | The Rising MeghalayaMarch 25, 2021

Ka ïing dorbar thawaiñ jong ka Jaiñtia Hills Autonomous District Council kala pdiang iaki dak thoh Pnar ne ki dak A-B Jaintia haka Dorbar Mang Tyngka ka konsil haka sngi Palei

U Executive Member ba dei ruh u Chairman jong ka Jaiñtia Alphabet Sub Committee u ma Phasmon Dkhar ula wanrah iaka report jong ka sub committee bad ka ïing dorbar da kawei ka sur kala pdiang ia kane ka report halor ki dak thoh A-B Jaiñtia (The Jaintia  Phonetic Alphabet).

U Phasmon haba wanrah iaka report ula ïathuh ïaka jingsdang rin dur iaki dak thoh naduh u snem 1937 lyngba u (L) Albin Pariat. Une u rangbah ula thaw bun tylli ki jingrwai bad ula wanrah lai tylli ki dak thoh ha ka ktien Jaiñtia, hynrei hadien ka jingwan synshar ka sorkar phareng kala pynthud noh iaka jingthmu jong u ban wanrah iaki dak Jaiñtia.

Hynrei hadien bala thaw iaka committee haka 18 tarik u Iaiong 2016 ban wad ki lad ki lynti ban pynmih iaki dak thoh Jaiñtia bad dei naduh une snem kane ka committee kala shimkhia hapoh ka jingialam u Prof PM Passah kum u chairman ka committee bad kiwei ki dkhot kiba shemphang lane ki Linguistic kila sdang ban pynwan dur iaki dak.

Na ki daw bym lah kiar la hap ban thaw biang ia kane ka committee bad u Lber 2021 ba ka committee hapoh ka jingialam u Phasmon kala ai iaka report sha ka Executive Committee JHADC kaba la pdiang ia kine ki dak thoh Jaiñtia.