Pdiang ka Jowai ia u snem thymmai 2023 da ka jingkyrmen ba un dei u snem ba dap kyrhai

Syllad | The Rising MeghalayaJanuary 3, 2023

U Snem Thymmai 2023, u la wan ban iuh kjat, ha kaba u khun bynriew ha satlak pyrthei, u la dep ban dem ngon ialade ha ka jingdwai, ryngkat ka jingkyrmen, ba un dei u snem u ba dap kyrhai, la ha ka liang jong ka trei ka ktah, ka kamai ka kajih, ka koit ka khiah, ban biang ka pule ka puthi, ka rep ka riang ha kaba u khun bynriew ula dem ban pan ia kine kiei kiei baroh na U Blei Trai Kynrad.

Ka sor Jowai kumba julong khlieh la ka snem, kala pdiang hun ia u snem thymmai da kaba shad kmen kynhoi risa ryngkat ki sur jingrwai bad iashimbynta haka jingbam khana hala ki jong ki shnong bad hadien pat kila mih sha surok ban shad paidbah.

Mynta u snem kane ka jingshad surok namar ba hap Sngi U Blei ka 1 tarik u bnai Kyllalyngkot, ki dong ki shnong hadien la jingbam khawai kila mih sha surok haka sngi Nyngkong. Ki dong, ki nongshong shnong ki la ïamih paidbah ban leit shad kmen ha kylleng ki shnong ki dong ka sor Jowai hapdeng ki sur kiba pynum bad pynkyndeh ïaka mynsien jong ki nongshong shnong.

Hadien ka jingshad na kylleng ka sor Jowai, ki dorbar shnong ki la wan ïuhkjat sa ha Ïawmusiang ban pyni iaka jingbit hakhmat ki nongpyniaid ka Jaiñtia Tourism and Environment Society, ka seng kaba kyntiew iaka kam jngohkai ka thain kaba la pynkhreh man u snem ban ai khusnam iaki shnong kiba tbit tam.

La ot ruh ia u cake snem thymmai da ka kurim jong u Dolloi ka elaka Jowai ka Kong Sukmynsiem Sumer ryngkat ka jingïadon lang ki dkhot jong ka JTES bad kiwei.