Pdiang ka Ladthadlaboh Pyllun iaka jingpynbeit MDC Constituency thymmai ka JHADC

Syllad | The Rising MeghalayaAugust 9, 2024

Hadien ba ka dorbar kyrpang jong ka Jaintia Hills Autonomous District Council (JHADC) kala ai ka jingmynjur iaka ain rew ne ka bill phiah bad pynbeit constituency thymmai, ka Ladthadlaboh Area Pyllun kala pynpaw ba ka pdiang hun ia kane ka bill.

Ka Ladthalaboh Area Pyllun ki kynthup iaka dorbar shnong Ladthalaboh, Caroline Colony, Mookyrdup, Lumpariat, Salaroh, Tyndowapung bad ka Dong Mooralong.

Kane ka ain rew ka dei ka “The Jaintia Hills Autonomous District (Constitution of District Council) Amendment Bill, 2024” kaba iadei ka jingpynbeit thymmai iaki 29 tylli ki constituency ka hap hapoh ka konsil.

Haba kren bad ki nongthoh khubor haka 9 tarik Nailar, na kaliang u waheh chnong Ladthadlaboh bad chairman Ladthadlaboh Area Pyllun haka jingiadonlang ki nongialam bad dkhot jong ka, u Bah ABM Shullai ula ong ba “Ngi pdiang hun iaka jingpynbeit thymmai iaka MDC constituency jong ka 18-Jowai North MDC Constituency.”

“Ngi pypaw ruh iaka jingsngewnguh kyrpang iaka delimitation committee jong ka JHADC bad iaka u Chief Executive Member jong ka JHADC Bah Thombor Shiwat kumjuh ki dkhot executive committee kiba sngap iaka jingud jingnam jong ngi hadien bala pynbna paidbah iaka Draft na ka bynta ban pynbeit thymmai iaki constituency da kaba pynhap iaka Ladthadlaboh bad ka Nangbah bad pharia iaka Ladthadlaboh North sha ka lai saw tylli ki constituency,” la ong u Bah Shullai

Ula ong “Ngi sngewkmen ban iathuh ia phi ba hadien ba ngi la shim iaka sienjam ban mih shakhmat ban pyrshah ba ym dei ban pharia iaki shnong kiba don haka Ladthadlaboh Area Pyllun, bad kim pyrshah lada pynkynriah sha kano kano ka constituency, bad katkum kaba paw haka bill kaba la mynjur ka konsil ruh baroh ki shnong kiba hap haka Ladthadlaboh Area pyllun kila neh shi jaka haka juh ka constituency.”

Ula bynrap ruh ba ha kaba iadei bad ka Dongmihsngi, kam shym la wan shakhmat ban snohkti lang bad ka Ladthadlaboh Pyllun. “Ngi la khot lang iaka Dongmihsngi, hynrei ka jubab kaba ngi ioh ka long ba ki sngew ba biang bad u paidbah nongshong shnong jong ka ruh u hun iaka jingpynhap iaki sha kawei ka constituency, kumta ngim lah ban pynbor iaka jingkwah jong ki,” la ong Bah Shullai.