Pdiang ka MCTA ia ka jingkhot iakren u VC ka NEHU halor ka jingpyntreikam ia ka NEP

Syllad | The Rising MeghalayaSeptember 10, 2023

Ka Meghalaya College Teachers’ Association (MCTA) ka la shim ia ka rai ban pdiang sngewbha ia ka jingkhot jong  u Vice Chancellor ka North Eastern Hill University (NEHU) ban pynlong ka jingiakren ha kaba iadei bad ka jingpyntreikam ia ka National Education Policy (NEP) 2020.

Na ka liang u general secretary ka MCTA u Bah AW Rani u la ong ba ka seng ka la ioh pdiang ia ka jingkhot sngewbha na u VC ka NEHU ha ka 8 tarik mynta u bnai na ka bynta ban pynlong ka jingiakren halor ki mat kiba iadei bad ka jingpyntreikam ia ka NEP 2020.

“Halor katei ka jingkhot iakren watla u Vice Chancellor u la kdew halor ki jingmyntoi lyngba ka jingpyntreikam ia ka NEP, hynrei kam shym la don pat kano kano ka jingpynpaw halor ki jingeh ki ban mih,” ong u Bah Rani, kata da kaba bynrap ruh ba ka MCTA kaba don ia ka jingkut jingmut ban trei na ka bynta ka jingbha ha ka liang ka pule puthi bad ka jingkhmih lynti  ia ki jingiakren kiba tei bad kiba seisoh ka la shim ia ka rai ha ka jingialang ka EEC kaba kyrkieh na ka bynta ban pdiang ia kane ka jingkhot iakren.

Kane ka jingiakren iamir jingmut hapdeng ka MCTA bad u VC ka NEHU kan long lashai ka sngi Nyngkong.Na ka liang u Bah Rani u la ong ba ka seng ka khmih lynti ia u Vice Chancellor ba un kren halor ki jingsngewkhia kiba kum ka seng ka la pynpaw ha kaba iadei bad kane ka bynta kaba la sdang naduh ka 21 tarik u Naitung ba la dep.

Na ka liang ka MCTA ka la dawa na u VC ka NEHU ba un weng noh ia ka notification ne ka jingpynbna ba la pynmih ha ka 12 tarik u Naitung ba la dep khnang ban pynkut noh ia kane ka jingiakynad kaba dang iai bteng halor ka mat  kaba iadei bad ka jingpyntreikam ia ka NEP.

Ka MCTA ka la shim ruh ia kane ka notification ba la phah da u ophisar ba kyrpang jong ka college development council (CDC) u Debasish Chowdhury ha ka 12 tarik u Naitung ba la dep sha ki principal jong baroh ki college kiba pyniasoh ne affiliated college na ka bynta ban pyntreikam ia ka NEP kum ka kam thok kam shukor.

Nalor kata ka MCTA ka la buh jingkylli ruh halor ka jingkynnoh shim rai kyrkieh na ka bynta ban pyntreikam ia ka NEP wat halor ki jingshisha ba kiba bun na ki college kim pat shym la long kiba la pynkhreh ban pyntreikam ia kane.

UBah Rani kham hashwa u la pyntip ba ki nonghikai jong ki 22 tylli ki college hapoh ka lama jong ka MCTA ki la kyntait ban shim klas na ka bynta ki first semester hapoh jong ka thup NEP bad kim shym la shim ruh ia kino kino ki kam, kata kum ha kaba pynkhreh  ban set jingkylli na ka bynta ki course jong ka first semister hapoh jong ka education policy kaba thymmai.Hynrei, watla katta ki la bteng ban aijinghikai ia ki khynnah pule naduh ka 3rd haduh ka 5th semester lyngba kane ka course kaba mynta.

“Ka lynti nangne shakhmat ban pynkut ia kane ka kynrum kynram katkum ka jingsngew ka jong ngi ka long ba u VC u dei ban weng noh ia katei ka notification bad ban pynsangeh shwa ia kane ka NEP na kane ka jingpule ba mynta bad ban iaid katkum ka lynti kaba rim.Ngi la don hapdeng ka jingiakhih mynta lah jan shi bnai, kumta ngi kyrpad ia u VC ba un weng noh ia kane ka notification bad pynkut noh ia kane ka kynrum kynram,” ong shuh shuh u Bah Rani.