Pdiang ka Sorkar Meghalaya ban dain kuna shi lak tyngka ia u kontraktor bym shna bha iaka surok

Syllad | The Rising MeghalayaSeptember 21, 2019

SHILLONG: Ka long ka khubor kaba sngewtynnad bad kaba ai mynsiem ban ioh ia ki surok kiba  bha namar yn dain kuna shi lak tyngka ia uno uno kontraktor u bym shna bha ia ka surok katkum ka ki kyndon bala buh da ka tnat ba dei khmih katkum ka kyndon ain 198 (A) (2) jong ka Motor Vehicles Act (Amendment) 2019.

Kane ka long namar ba ka Sorkar Jylla hapoh ka jingialam u Conrad K Sangma ka la rai ban pdiang ia ka Motor Vehicles Act (Amendment) 2019 bad yn pyntreikam noh ia ka ha baroh kawei ka jylla naduh mynta bad ki jingdain kuna ha kane ka ain kaba thymmai ki long kiba la pher bakla pher na kiba barim.

Katkum ka notification jong ka tnat Transport jong ka Sorkar Jylla lyngba u No TPT. 101/2010/Pt./247 Tarik 16 September, 2019, u Commissioner and Secretary jong ka tnat Transport u Bah M R Synrem, IAS u la pynbna ka sorkar jylla ka la rai pyntreikam ia katei ka ain kaba thymmai kaba la phah da ka Sorkar Kmie lyngba u No. SO-3110 (E) Dated 28.8.2019 hadien bala pdiang ia jingpynkylla da u Lat ka jylla.

Lyngba katei ka ain, ka Sorkar ka la pynrung ia ka kyndon bathymmai kaba dain kuna haduh shiphew hajar tyngka ia u no uno u briew u niah kali u bym ai lad ia ka Ambulance ne ka Fire Brigade ha ka por ba ka don ha ka kam namar ka Sorkar ka la shem ba don ki briew ki bym ai lad satia ki Ambulance ne Fire Brigade wat haba kitei ki kali ki la pynpah ia ka siren bad pynmeh ki light saw ne blue.

Naduh nangne shakhmat ka la long beain lada u ne ka briew ba shong hadien jong ka thuk thuk (Motor bike ne scooter ne scooty) u ne ka khlem phong helmet bad ki la ban shah dain kuna shi hajar tyngka.  Lada uno uno ne kano kano ka ne u briew ba hapoh 18 snem ka rta ki pynkhein ia kano kano ka ain ka kanun jong ka Motor Vehicle Act yn shah dain kuna haduh arphew san hajar tyngka.

Katkum katei ka ain yn dain kuna shi hajar tyngka ha ka sien ba nyngkong bad ar hajar ha ka sien kaba ar ia uno uno ne kano kano ka ne u nongniah kali ka ne u bai ai horn lynter ne khlem donkam bad ai horn ha ki jaka bala mana.

Khnang ban tehlakam ia ka jingniah kali ha ka por bala buiad, yn dain kuna shiphew hajar tynga ha ka sien kaba nyngkong bad 15000 tyngka ha ka sien kaba ar bad ia kino kino ki briew kiba niah kali ha ka por bym biang ka bor pyrkhat pyrdain ne bym shait bym khlain kaba la ban wan rah ia ka jingma ia kiwei yn dain kuna shi hajar tyngka ha ka sien kaba nyngkong bad ar hajar tyngka ha ka sien kaba ar.

Katei ka ain Motor Vehicle kaba thymmai ka la khang pyrshah ia ka jingpyndonkam ia ka mobile phone ha ka por niah kali, ka jingshim pass ne overtake ha ki jaka bala mana ne ki no overtaking zone, kiba pynkhein ia ki stop sign ne ki bym sangeh haba la shah pynsangeh, kiba niah kali lamwir ne kulmar, ki niah kali pyrshah ia ka rukom iaid kali bad lada lap ia uno uno ne kano kano kiba pynkhein ia kine ki kyndon ain yn shah dain duna san hajar tyngka ha ka sien kaba nyngkong bad shiphew hajar tyngka ha ka sien kaba ar.

Kane ka long ka jingmaham kaba tyngeh ia ki nongniah taksi ne sumo ne kali rit tourist ba lada lap ban kit palat pud ne palata ia ka capacity bala buh yn dain kuna  200 tyngka shi passenger ba tam ia ka capacity bad ia ki briew kiba niah kali khlem laisen yn shah dain kuna haduh san hajar tyngka.

Ia ki nongniah kali kiba smat ba pynher kali smat ne ialeh race ha ka surok paidbah ka ain kam don jingmap shuh mynta namar yn dain kuna san hajar tyngka ha ka sien kaba nyngkong bad shiphew hajar tyngka ha ka sien kaba ar.