Pdiang lypa ka VPP ia ka jingshah rem da kaba wanrah briew na bar ha ka jingialang: Dhar

Syllad | The Rising MeghalayaFebruary 19, 2025

U National General Secretary ka National People’s Party (NPP) bad Symbud Myntri Rangbah ka Jylla, u Bah Sniawbhalang Dhar ha ka 18 tarik Rymphang u la ong ba ka Voice of the People Party (VPP) ka la pdiang lypa halor ka jingshah rem lypa hadien ba ka la hap ban wanrah briew na ki san tylli ki constituency sha ka jingialang jong ka ha ka shnong Umladang.

Ia kane u Dhar u la pynpaw haba kren ha ka jingialang ialap elekshon ha ka shnong Moobakhon ban pan jingkyrshan ia u heh ka JHADC bad MDC ka Moodop-Umladang u Ma Thombor Shiwat bad u kyrtong ka party u Jesse Suiam na Moodymmai-Nongkroh ha ka shnong Tyrchang.

Ha Moobakhon, u Dhar u la kyrpad ia ki paidbah ka Moodop-Umladang constituency ba kin ai biang ka jingshaniah ka jong ki hapoh ka jingialam jong u Ma Thombor Shiwat uba dei u CEM uba la slem tam hapoh Rilum Jaintia.

U la ong namar ka VPP ka la tip ba u ma Shiwat un ioh ia ka jingjop, kumta kim don lad da kumwei pat hynrei ban lum ia ki briew na ki san tylli ki constituency ba kin wan iashim bynta ha ka jingialang jong ka ha Umladang. “Kane ka pyni ba ki la pdiang ia ka jingshah rem. Kumta, nga kyntu ia ki paidbah ba kin pynthikna ba u Ma Shiwat un ioh ia ka jingjop kaba donburom. Kito ki bym ju kyrshan ia nga mynta ki la wan shakhmat bad ngi la pdiang sngewbha ia ki,” u la bynrap.

Haba pynpaw ba ka NPP ka dei ka party kaba kham duna ka tyngam bad kham bun ka kam, u Dy.CM u la ong, “Kiwei ki seng sain pyrthei ki dap da ki jingthok jingshukor, kumta phim dei ban shah ialam bakla ha ki jingkular ba suda jong ki.”

Ha ka shnong Tyrchang u Bah Sniawbhalang u la ong ba ka party ka sngew skhem ba u Bah Suiam un ioh ia ka jingjop na Moodymmai-Nongkroh constituency.

“Kiwei pat ki party ki la kynthoh lamler ia ngi namar ba ngi dei ka sorkar kaba treikam. Dei na kata ka daw ba baroh ki kwah ban kawang maw ia u dieng uba seisoh namar ki kwah ba ka sorkar kan ai lem sha ki ia ki soh. Hynrei, katba nang bun kiba kynthoh pyrshah ia ngi, katta ngi nangkhlain. U nombor jong ngi u la nangkiew bad mynta ka NPP ka la don haduh 32 ngut ki MLA,” u la ong.

“Nalor kata, kam ju don satia ka jingiashrut hapoh ka party namar ka dei ka party kaba pynleit jingmut ha ka jingskhem bad ka roi kapar jong ka jylla bad ka bha ka miat jong ki paidbah. Ngi la iaid ha kane ka lynti na ka bynta ka jingkiew jong ka jylla,” u la ong da kaba bynrap, “Ka VPP ha kawei pat ka liang ka nongrim jong ka ka long tang ban pynheh tyngam ym ban trei ia ka kam.U Bah Ardent u la leit ban pyniasoh bad jan baroh ki seng sain pyrthei. Hadien ka elekshon ngam tip sa ka party aiu kin ia thaw. Ka NPP ka don ia ka thong ban wanrah ia ka roi ka par. Ngim khuslai watla ngi duh thiah duh em na ka bynta ka roi ka par jong ka jylla bad ki constituency,” u la bynrap.