Pdiang sngewbha ka BJP Meghalaya ba shah thung ka Kong Nongrang kum ka DGP bathymmai

Syllad | The Rising MeghalayaMay 12, 2024

Ka BJP Meghalaya haka 11 tarik Jymmang, ka la pdiang sngewbha ha kaba iadei bad ka rai jong ka sorkar ban thung ia ka Kong Idashisha Nongrang kum ka Director General of Police (DGP) bathymmai ka Jylla.

Na ka liang ka party ka la kam ba kane ka jingshah jied ka dei ruh kaba ka party ka la ban jur ia u Myntri Rangbah ka Jylla naduh kine ki khyndiat sngi ba la dep.

Na ka liang u nongaiktien ba hakhliehduh ka BJP ha ka jylla u Bah M Kharkrang u la ong, “Ka Meghalaya BJP ka shim ia kane ka kabu ban ai khublei kyrpang ia u Myntri Rangbah bad ia ka sorkar halor kane ka jingjied kaba dei biang, kata kaba long ruh katkum ka jingangnud jong ka party ha ka Jylla.

Haba ai khublei kyrpang ia ka Kong Nongrang halor ka jingshah jied ban shimti ia kane ka kam kaba hakhliehduh jong ka Tnat Pulit, u Bah Kharkrang u la ong, “Ka BJP Meghalaya ka duwai kyrpang ba U Blei un ai ia ka ia ka bor bad ka jingstad jingshemphang na ka bynta ban ialam ia ka Tnat Pulit ka Jylla ha baroh ka samoi treikam kum ka DGP. Ka party ka iohi ruh ha kane ka longkmie ophisar ia kata ka jinglong shida bad halor ka jingshemphang ka jong ka ha ka kam kum ka heh pulit, kane ka jingshimti ia kane ka kam ka la wanrah ruh ka jingpyrto ha ka Jylla hi baroh kawei.”

“Ka BJP kum ka party barabor ka ju angnud ban kyntiew ia ki kynthei bad na ka bynta ban khmih halor ka bha ka miat jong ki trai shnong riewlum, bad ka long ka jingsarong ia ka Meghalaya ban ioh ia ka DGP kynthei kaba nyngkong eh, bad ka party ka kyrmen ia kaba bha tam na ka bynta jong ka bad ba kan lah ban shim ia ka jingkitkhlieh,” ong shuh shuh u nongaiktien.