Pdiang sngewbha u CM ka jylla ia ka rai ka Sorkar Pdeng ban bhah kyrpang iaki kynthei ha Parliament bad state assembly

Syllad | The Rising MeghalayaSeptember 20, 2023

U Myntri Rangbah ka jylla u Conrad K Sangma hynne ka sngi ba Ar u la pdiang sngewbha ia ka rai ka sorkar pdeng ban bhah kyrpang 33 percent ki seat na ka bynta ki kynthei parliament bad ki iingdorbar thaw ain ki jylla.

Haba kren sha ki lad pathai khubor, u Sangma u la ong; “Hooid ka long ka jingshisha ba kum ka jylla kaba ai jait sha ki kynthei bad kum u riew shimet uba don ia ka jingngeit halor ka jingpynkupbor ia ki kynthei, Nga da sngewkmen halor kane ka Bill bad Nga pdiang sngewbha ia kane ka Bill. Nga thikna ba kane kan ialam sha ka jingpynkhlain ia ka jingmihkhmat jong ki kynthei hapoh ka iingdorbar Lok Sabha kumjuh hapoh ki iingdorbar thaw ain ki jylla.”

“Kum ka jylla hi baroh kawei kadei kaei kaei kaba Nga sngew thikna ba ka jylla hi baroh kawei kan pdiang sngewbha ia kane namar kadei kawei na ki khyndiat eh ki jylla hapoh ka ri kaba don ia ka jingngeit ia ka imlang sahlang kaba aibor ha ki kynthei, kata ka jingai jait sha ki kynthei kaba long shibynta jong ki riti dustur ka jong ngi,” ong u CM ka jylla.

Da kaba pynpaw ba ka National People’s Party (NPP) ka jong u shen kan shim ia ka sienjam ban ai ka jingithuh da ka sorkar halor kane ka bynta, u Sangma u la ong; ” Kum ka party, ka long ka jingshisha ba ngin shim ka jingpynskhem halor kane ka bynta, ngin khot ia ka jingialang bad hadien ba ngi la pynskhem ia kane ngin shim ia ka rai ban ai ka jingmynjur. Kum u president jong ka party bad kum u riew shimet kalong kaei kaei kaba ngi da pdiang sngewbha.”

 Halor ka jingkylli, u CM u la ong; “Phi iohi ba dei na kane ka daw balei ba u Myntri Rangbahduh ka ri u la shim ia ka rai ban rah ia kane ka mat bad kane ka dei kaei kaei kaba la dep ban iamir jingmut ha ki por kiba la dep namar ki jingshisha halor ka jingduna ki nongiashim bynta, hynrei mynta ka la don ka bhah kyrpang kumta mynta kan long ka daw na ka bynta ki kynthei ba kin wan shakhmat bad ong namar kiwei kim lah ban ia aireng, kumta ki kynthei kin hap ban iakhun bad kane ka dei ka jingthmu jong kane ka bhah kyrpang.