Pdiang u Myntri Sorkar Pdeng ban pynkynriah ia ki samla pule ka jylla na CAU Imphal sha Kyrdemkulai

Syllad | The Rising MeghalayaAugust 14, 2023

U Myntri ka sorkar pdeng uba khmih ia ka tnat ka rep ka riang mynta ka sngi 14 tarik u la mynjur ia ka jingkyrpad jong u Myntri Rangbah ka Meghalaya u Conrad Sangma na ka bynta ban shah ia ki samla pule ka jylla kiba pule hapoh Central Agriculture University (CAU), Imphal ba kin bteng ia ki jingpule ki jong ki hapoh ka CAU Campus ha Kyrdemkulai in Ri Bhoi District.

Ka hukum ba la pynmih da ka Central Agriculture University (CAU), Imphal haka sngi Nyngkong, ka la ong ba ka university ka la shim ia ka rai ba ka jingshim klas ia ki samla pule Undergraduate batches jong ki samla pule kiba dei na shabar ka jylla Manipur kiba pule hapoh College of Agriculture, Imphal bad College of Food Technology, Imphal na ka bynta u snem 2020-21, 2021-22 bad 2022-23 yn pynlong lyngba ka online mode.

Lah ban kdew ba na ka liang u Myntri Rangbah ka jylla u Conrad K Sangma ha ka 7 tarik mynta u bnai ha ka jingleit sha New Delhi u la ai ia ka shithi sha u Myntri ka tnat  Agriculture and Farmers Welfare, u Narendra Singh Tomar ha kaba u la kyntu na ka bynta ban pynkynriah ia ki samla pule ka Meghalaya kiba pule hapoh CAU, Imphal, ba  kin bteng ia ki jingpule ki jong ki hapoh CAU Campus ha Kyrdemkulai in Ri Bhoi District khnang ba kin lah ban bteng ia ki jingpule khlem kano kano ka jingthut.

Kane ka hukum jong ka CAU Imphal ka la ong ba ka jingpynkhreh ka la iaid shakhmat namar ka jinglong jingman ha ka jylla Manipur bad ruh halor ka jingkyrpad da ki kmie ki kpa jong ki samla pule bad ruh na ki riew pawkhmat bad ki heh sorkar.

Ka hukum kaba la pynmih da u Registrar ka CAU Imphal u TR Sharma ka ong ba ia ki klas na ka bynta ki Master bad PhD hapoh ka college Agriculture, Imphal ruh yn pynkylla sha ka online.

U Conrad Sangma uba la pynpaw ia ka jingkyrmen halor ka jingwanphai kloi jong ka jingsuk hapoh Manipur, u la ong ba na ka liang ka sorkar Meghalaya ka angnud ban pynthikna ba ki samla pule ka jylla kin lait na ka jingshah ktah namar kane ka jinglong jingman hapoh katei ka jylla.