Phah jingthoh ka JNC sha u CM  ba sahteng haduh 15 tylli ki tnat sorkar ha EJH

Syllad | The Rising MeghalayaAugust 30, 2023

Ka Jaiñtia National Council (JNC), Khliehriat Circle hapoh ka jingialam u general secretary u Mebanteilang Sukhlain haka sngi Balang ka la leit ban ai da ka jingthoh sha u Myntri Rangbah ka Jylla lyngba u Deputy Commissioner, East Jaintia Hills District u Abhilash Baranwal ban wanrah noh ia ki tnat sorkar bapher bapher ki ba don haduh 15 tylli kiba ym pat wanrah hapoh kane ka district.

Kine ki tnat ki kynthup ia ka Assistant Registrar Cooperative societies,  Assistant Director IPR, Jt. Director of Schools Education & Literacy, Divisional Forest Office, (wildlife), Divisional Forest Office (Social Forestry), Divisional Forest Office (Territorial),  District Librarian, Executive Engineer, (CEW) A.H & Veterinary office, Executive Engineer, PHE Electrical Division, Executive Engineer, PHE (RWS) Division, District Sericulture Office, District Urban Planner/Town Planning Office, Executive Engineer, Urban Affairs,  District Handloom Office bad Weaving Inspector.

Ka JNC ka pynpaw ba ka East Jaiñtia ka dei kawei na ki district kaba ai bun tam ka khajna sha ka sorkar bad ka jingdon kong ka ruh ka la kot sha ki 11 tylli ki snem hynrei haba phai pat sha ka development ka long kaba sah dien tam.

Kala ong ruh ba ka jingbym pat don ia kine ki ophis  sorkar ka buh jingeh haduh katta ia ki paidbah ha kaba ki hap ban leit shaduh sha Jowai bad sha Shillong, bad kane ka wanrah jingeh bha khamtam ia ki duk ki suk. Ha ka memorandum ka ka pynpaw ba kiba bun na kitei ki tnat sorkar ki dei kiba la i donkam shisha ban don hapoh ka district ban lah ban treikam bha na ka bynta ban kyntiew ïa ki paidbah, kumjuh ruh ban kyntiew ïa ka district bad ia ka tnat pule puthi ha ka thaiñ.

Ka JNC kala ong ruh haba phai sha ka ophis PHE, ka ophis ka la don ha Khliehriat, kaba dei jong ka tnat Electrical bad ka tnat Distribution, ka long pat kaba donkam ban don da ka ophis jong u Executive Engineer (PHE) khnang ban dup lah ban treikam pura, namar ki SDO kim pat lah ban treikam pura.

Ha kaba ïadei pat bad ka tnat khlaw ka seng ka ong ba ka tnat Forest lei, watla ka ophis ka la don ruh, hynrei long kumba kam don, namar ki nongtrei kim pat lah ban leh eiei ruh napoh ka district, dang hap ban pyndep ïa ki kam ki jam baroh na Jowai, bad ruh ki nongtrei kiba don ha Khliehriat ki shu long tang kum kito ki nongpeit.

Ha kaba ïadei bad ka tnat pule puthi ka seng ka pynpaw ka jingsngewkhia kaba jur bad ong ba ka la dei ka por ban don noh da ka ophis u Jt. Director of Schools Education & literacy khnang ba kan kyntiew ia ka pule puthi ha ka thaiñ.

Kumta ka seng ka kyrpad jur ia u Myntri Rangbah ka Jylla u Conrad Sangma bad ka Sorkar ba ka la dei eh ka por ban phai khmat noh sha kane ka thaiñ bad ban wanrah noh ia kine ki tnat sorkar bapher bapher hapoh kane ka District, namar ka jingbym pat biang lut ki tnat treikam jong ka sorkar hapoh ka district ka buh jingeh haduh katta.

Shuh shuh ha  ka ba iadei bad kane ka seng ka la ai copy ruh sha ar ngut ki MLA kane ka thaiñ, kata sha u Bah Kyrmen Shylla bad ka Kong Santa Mary Shylla  kiba long ki nongmihkhmat jong kane ka thaiñ ba kin kren eiei halor kane ka bynta.