Phah ka BJP Meghalaya ia ki kyrteng ki 6 ngut kiba kwah iakhun MP na Tura bad 5 na Shillong

Syllad | The Rising MeghalayaMarch 15, 2024

U State president ka BJP u Rikman G Momin u la ong ba ka party kala phah sha Delhi ia ki 5 tylli ki kyrteng jong kiba kwah ban ieng iakhun ha kane ka ilekshon Lok Sabha na Shillong bad 6 ngut na Tura Parliamentary constituency.

U la ong ruh ba u nongialam ka BJP uba dei ruh u Myntri ka sorkar Jylla u Bah AL Hek u dei uwei napdeng ki san ngut kiba pan tiket ban iakhun ia kane ka ilekshon na Shillong parliamentary seat.

Haba pynpaw ia kane sha ki lad pathai khubor ha ka 15 tarik Lber, u Rikman u la ong, “Nga la dep ban phah ia ki kyrteng jong kine ki kyrtong sha ki nongialam ba halor sha Delhi.”

U la ong ruh ba nalor u Bah Hek kiwei pat kiba pan tiket ki kynthup ia ka Dr Fenela Lyngdoh Nonglait, u President barim ka BJP Bah Ernest Mawrie, u President ka BJYM Mewaker Lyngdoh bad ka Kong Sumitra Laloo.

Katba na ka bynta ka Tura seat kiba pan tiket ki kynthup ia u MDC ka Tura u Bernard N Marak, ki MLA barim u Winnerson D Sangma bad u KC Boro, ki MDC barim u Boston Marak, Ria Sangma bad u Thomas Marak.

Haba kylli, u Momin u la ong, “Ngim pat lah ban tip lano kin pynbna ia ka kyrteng jong ki kyrtong, hynrei kan sa mih ruh shen sa ki kyrteng ha ka thup kaba lai.”

Nalor kata une u nongialam ka Seng u la ong ruh ba ka party BJP ka la pynkhreh bha na ka bynta ban iakhun ha kane ka ilekshon ka ban wan, bad ba ka la iaid shaid shaid ha kaba iadei bad ki jingialap ilekshon sha kylleng ki jaka.

Shuh shuh u Momin u la ong ruh ba ka mat kaba iadei bad ka Citizenship (Amendment) Act, kan ym ktah satia ia kane ka party ha kane ka ilekshon Lok Sabha ha kane ka Jylla.