Phah ka NPP ia ki kyrteng ki kyrtong MP na Shillong bad Tura

Syllad | The Rising MeghalayaNovember 23, 2023

U President ka National People’s Party (NPP) Meghalaya u Bah Prestone Tynsong haka Balang ula pyntip ba ka State Election Committee jong ka seng kala dep ban phah ia ka kyrteng jong ki kyrtong kiba kwah ban iakhun ia ka MP Election na Shillong bad Tura Parliamentary seat bad mynta ki dang ap ban ioh ia ka jingmynjur na u National President ka NPP u Conrad K Sangma.

Haba kren sha ki lad pathai khubor hadien ka jingialang, u Bah Tynsong u la ong; “Hapoh jong kane ka taiew lehse ngin ioh ia ka jingmynjur na u national president ha kaba iadei bad kyrtong kiba pan tiket na baroh ki artylli ki constituency ngan sa pyntip halor ka rai.

U la ong ruh ba ki don ym duna ia ka 5-6 ngut kiba pan tiket na kawei ka constituency, hynrei u la kyntait ban iathuh ia ki kyrteng jong kine kiba pan tiket ia kiba la phah da ka committee na ka bynta ban ioh ia ka jingmynjur.

U la ong ruh; “Sngewbha wat nym pynbor ia nga halor kane namar kane ka kam ka dang dei ka bym pat lah ban pyntip hano hano ruh, kata tad haduh ban da ioh shwa ia ka jingmynjur na u national president ka NPP, kumta yn lah ban kren eiei halor kane.”