Phah khang khyrdep ka MSPCB ia 6 tylli karkhana pynmih tdem jaboh ha Byrnihat

Syllad | The Rising MeghalayaSeptember 4, 2024

Ka Meghalaya State Pollution Control Board (MSPCB) ka la hukum ban khang khyrdep syndon ia ki hynriew tylli ki karkhana kiba jur ka jingpynmih tdem jaboh hapoh ka Industrial Unit, Byrnihat.

Kine ki karkhana kiba la shah phah khang khyrdep ki dei kiba la bteng ban pynkhein ia ki kyndon bad ki jingbthah jong ka MSPCB ban tehlakam halor ka jingpynjakhlia ia ka lyer bad ban iada ia ka koit ka khiah jong ki paidbah nongshong shnong.

Kane ka la wan long ruh hadien ka jingleit jurip da ka kynhun ka MSPCB hapoh ka jingialam jong u Principal Secretary ka Tnad Forest & Environment, u Sampath Kumar, IAS ia ki karkhana kiba don ha Byrnihat ha ka 3 tarik mynta u bnai.

Ha kane ka jingleit jurip la shem ba kine ki karkhana kim don satia ia ki meter kiba biang ban khmih halor ka jingpynmih tdem ne Pollution Control Device (PCD), bad kaba la wanrah ka jingsngewkhia kaba jur halor ka jinglah ban tehlakam ia ka jingpynmih  ia ka tdem jaboh.

Nalor kata la shem ruh ba ka jingpynmih tdem jaboh ka long haduh PM2.5 level ha ka 64.2 µg/m³, kaba la kynjoh haduh lai shah ka jingpynjaboh ia lyer bad ia kaba la shim ba kam long kaba shngain ia ka koit ka khiah (kata 35 µg/m³ ha ka  24-kynta).

Lah ban kdew ba na ka liang ka MSPCB ka la dep ban pynmih teng ia ki jingbthah ia ki karkhana ba ki dei ban tehlakam ha kaba iadei bad ka jingpynmih tdem jaboh, Particulate Matter (PM 10 and PM 2.5), Sulphur Dioxide (SO2), bad  Nitrogen Dioxide (NO2) hapoh u pud ba la buh khnang ban khanglad ia ka jingpynjaboh ia ka mariang bad namar ka jingbuh jingma ia ka koit ka khiah jong ki nongshong shnong kiba don marjan.

Hynrei, wat hapdeng kane ka jingbthah, kine ki karkhana ki la pulom ban bud ryntih ia ki kyndon, kaba kynthup halor ka jingpyntreikam ia ki Pollution Control Device (PCD) bad pyndait ia ki Online Continuous Emission Monitoring System (OCEMS).

Kumta namar kine ki jingpynkhein, ka MSPCB ka la hukum ban khang khyrdep noh mardor ia kine ki karkhana tad haduh ba kin da lah ban bud beit ryntih ia ki kyndon kiba iadei bad ka mariang.