Phah khubor sngewlem u CEM KHADC sha kiba haïing i Ma (L) Mihsalan Suchiang

Syllad | The Rising MeghalayaSeptember 8, 2021

U Chief Executive Member jong ka Khasi Hills Autonomous District Council (KHADC) Bah T.W Chyne ula phah khubor sngewlem sha kiba haïing hasem jong I (L) Mihsalan Suchiang MLA/MDC barim ka rilum Jaintia.

“Nga pynpaw ka jingsngewsih bad sngewbynnud iaka jingkhlad noh jong I (L)Mihsalan Suchiang, MLA barim haka 7tarik Nailar, 2021. Ka jingkhlad noh ka jong I (L)Mihsalan Suchiang ka long ka jingduh kaba khraw ym tang iaka iing ka sem, hynrei iaka Party UDP bad iaka Ri bad ka Jaidbynriew hi baroh kawei,” la ong u Bah Chyne.

Ula ong ba I (L) Mihsalan Suchiang I long uwei napdeng ki nongseng (Founder Member) iaka United Democratic Party bad I long ruh u briew uba sngewrit, uba shida bad ka jinglong beit haka rukom pyrkhat pyrdain. I long ruh u briew uba skhem ka nongrim bad uba ieid bad ba iaineh ha ka seng riewlum. I (L) Mihsalan Suchiang I long u briew u bym da bunktien than hynrei wei bala kren ma I ki kyntien ki long kiba shongnia bad khia jingmut bha. I la long ruh kum u nongmihkhmat sha ka iing Dorbar Thawain la lai sien bad kum u Nongmihkhmat sha ka District Council la saw sien na Mowkaiaw Constituency. Haduh ka sngi ka jingkhlad noh jong I, I la bat kum u State Party Adviser jong ka Seng United Democratic Party. Hapdeng kine ki snem ila noh synniang shi katdei eh iaka thain Mowkaiaw ha baroh ki liang ia kaba ngam lah kdew lut hangne. Nga sngew ban ong ngi sah ram haduh katta katta ha kaba ia nujor bad ki kam kaba I la leh naka bynta ka thain Mowkaiaw bad ka Jylla hi baroh kawei.

U Bah Chyne ula phah iaka jingsngewlem sha ka iing ka sem khamtam ia I Lok, ki Khun ki Kti, ki Hynmen ki Para, bad kumjuh ruh iaki bahaiing hasem jong I. “Nga buh ruh ha ki jingduwai ba U Blei Trai Kynrad un pyntngen bad pynshaitbor iaka jingmynsiem kaba la mong bad lwet ka jong phi. To U Blei ka jingsuk un don ryngkat bad phi ha kum kane ka por ba phi mad ia U Lyoh uba kah dum ha ka longiing longsem ka jong phi. To ai ba ka mynsiem jong I kan ioh iaka jingjahthait bymjukut.” la ong Bah Chyne.