Phah kyrwoh sngewlem ka KSU-KC sha ki ba haïing u Dolloi Rymbai

Syllad | The Rising MeghalayaSeptember 20, 2019

KHLIEHRIAT: Ka Khasi Students Union Khliehriat Circle, ka la pynpaw ka jingsngewsih kthang halor ka jingkhlad kyndit noh u  Pa Dolloi ka Elaka Rymbai, u ma Elios Swer lem bad ar ngut kiba haiing jong u, na ka jingkylla ka lieng kynda ba ki shnong ha wah Prang.

Halor kane ka jingjia ka seng ka phah ia u kyrwoh sngewlem sha baroh kiba ha iing ha sem jong u Pa Dolloi bad kumjuh ruh sha kiba ha ïing jong kito ki ar ngut kiba la khlad lang ha kane ka jingjia ba sngewsih haka sngi Palei.

Katkum u kyrwoh sngewlem ba la phah da u bah SS Niangti, President KSU-Khliehriat Circle la ong ba une u Pa Dolloi u dei u briew uba ju ai mynsiem bha ïa baroh ki samla kiba ju kit bad bah ïa ka lyngkor ka jaitbynriew, u long ruh u riew rangbah uba baroh ki ieid ba shaniah “Yn ïai pyrto junom  ïa ka jinglong ba lui lui jong u kum u nongïalam jong ka thain East Jaintia, uba ju don ka jingkitkhlieh ïaka thain bad ka elaka.”

La ong ruh ba ka jingkhlad ba kyndit u Pa Dolloi Elios Swer ka long ka jingduh kaba khraw ym tang ïa kiba ha ïing ha sem bad ïa ka Elaka Rymbai, hynrei ka long ka jingduh kaba khraw ïa ka East Jaintia Hills District hi baroh kawei namar u dei uba ju ïa kit ïa bah lang ïa ka eh ka shon jong ka District hi baroh kawei.