Phah Legal Notice ki nongsaid ain u Dy CM sha u Bah Pala, dawa pan map bad bai mynrain khmat ba 100 klur

Syllad | The Rising MeghalayaSeptember 5, 2024

U Symbud Myntri Rangbah ka Jylla u Bah Sniawbhalang Dhar ha ka 4 tarik Nailur u la phah da ka Legal Notice sha u President ka Congress uba dei ruh u MP barim ka Shillong u Bah Vincent H Pala bad dawa ba u dei ban pan map khlem jingteh hapoh ka hynniew sngi bad ban siew ia ka bai mynrain khmat kaba T.100 klur namar ki kam pynjah burom.

Kane ka Legal Notice ka long pyrshah ia ka jingkren kynthoh ba dang shen jong u Bah Pala pyrshah ia u Bah Sniawbhalang da kaba kynnoh ba u dei u Nongaiktien jong ka Rashtriya Swayamsevak Sangh (RSS) bad ka Bharatiya Janata Party (BJP) namar ba u don ha ka jingshah peit bniah ha ka CBI.

Ia kane ka Notis la phah da ka Sharan & Associates LLP Advocates and Solicitors kaba don ia ka ophis treikam ha Barakhamba Road, New Delhi.

Lah ban kdew ba u Bah Vincent Pala ha ka jingiakynduh bad ki lad pathai khubor ha ka 22 tarik Nailar ba la dep ula kynnoh ia u Bah Sniawbhalang Dhar ba u dei u nongaiktien ka RSS bad ka BJP kat shaba ki don, ka sur jong ki ka dei ka Congress Mukt. U la kynnoh ruh ha kaba iadei bad ka jingpyndonkam da ka pisa beain lyngba u drok bad ki kam tih dewiong beain.

Ka Sharan and Associates ha kane ka Notice sha u Bah Pala ka la ong, “U briew jong ngi u la kubur ba ka jingbat ha ka kam paidbah ka ju wanrah ia ki jingshah kynthoh ba bunjait, hynrei kane ka jingkynthoh ba lamler bad kaba long beain ka dei ka jingpyrshang ban pynthohbria bad pynjah burom ia u. Kane ka jingkren jong u sha ki lad pathai khubor ka dei kaba la thmu ban pynthohbria ia u briew jong ngi (Bah Sniawbhalang) tang na ka bynta ki jingkhwan myntoi shimet.”

 “Kumta ngi la thoh ban dawa na phi, kata (a) ba phin thoh da ka shithi ba la weng noh ia ka jingkren bad pan map ia kaba yn ai jingmynjur da ma ngi na ka bynta u briew jong ngi (client) bad ban pynmih ruh ia ka ha baroh ki kotkhubor ba iaid iew. (b) Ai da ka jingthoh ban kular ban sangeh ban pynmih biang ia kiba kum kine ki jingkynthoh kiba ktah ia u briew jong ngi bad (c) siew ia ka jingpynjah burom ne bai mynrain khmat kaba T.100 klur namar kane ka jingkynthoh ia u briew jong ngi. (d) siew ia ka bai lut bai sep u briew jong ngi namar ka jingpynlut ha kane ka kam.”

“Nalor kata phi dei ban weng noh ia kane ka jingkren ba phi la pynpaw sha ki lad pathai khubor bad ban pynmih ia ka jingpan map paidbah na u briew jong ngi, ban kubur ba ka jingkren kam long kaba shisha. Phi dei ruh ban ai da ka jingthoh ia ka jingpan map nalor ka jingkular ban ym mliem shuh bang pynmih ia kum kine ki jingkynnoh hapoh ka hynniew sngi naduh ka sngi ba phi la ioh pdiang ia ka Legal Notice lyngba ka WhatsApp/e-mail/speed post bad kiwei pat kat kiba phi ioh pdiang shwa,” ong ka Notice.

Nalor kata ka la maham ruh da kaba ong, “Sngewbha sngewthuh ba jingbymlah ban leh ia kine ki jingdonkam ba la kdew ha ka Notice hapoh ka hynniew sngi yn shimkhia jur bad u briew jong ngi (Bah Sniawbhalang) um banse ban shim da ka lynti jong ka ain bad ban leit sha ki civil court, kynthup ka mudkotuma bai mynrain khmat kumjuh ka jingujor kam bymman ba lah ban pynsaja hapoh ki kyndon 351 bad 356 jong ka BNS, 2023.”