Phah leit khat biang ka dorbar shnong Myntriang ïaki ñiut kiba la theh ha krem dewiong

Syllad | The Rising MeghalayaMarch 15, 2022

Ka Dorbar Shnong Myntriang bad ki nongialam ka KSU Myntriang Unit haka sngi Nyngkong kila ïakynduh ia u Deputy Commissioner, West Jaintia Hills District bad ai da ka dorkhat halor ka jingleit theh ñiut ka Jowai Municipal Board (JMB) ha kawei ka krem dewiong haka shnong Myntriang khlem ka jingioh jingbit kaba la wanrah ka jingpyrshah kaba jur na u paid nongshong shnong.

U Waheh Shnong Myntriang u Ma Monjurlang Lamurong ula ong ba kila dep kren shai bad ai da ka jingthoh ha u DC ba un bthat ïaka JMB ba kan leit khat bad pynkhuid kloi kloi ïa kitei ki ñiut ba ka la theh ha kawei ka krem dewïong kaba la ïeh shrah khlem pyndonkam shuh naduh ka jingkhang tih dewïong ka NGT ba kaba jrong 30 phut hapoh arsngi bad na ka liang u DC ula kular ban ïakren bad ka JMB halor kane ka bynta.

“Ngi dawa naka JMB ba kan leit khat bad pynkhuid kloi kloi ïa kitei ki ñiut ba ka la theh ha katei ka krem hapoh 2 sngi,” la ong u ma Monjurlang.

Haba ïadei bad ka jingwan bret ñiut ka JMB, ula ïathuh ba ka Dorbar shnong ka lap haka 11 tarik une u bnai bad mar mar haka sngi ba bud ka la lum ïaka Dorbar naka bynta ban pynlong ka jingtohkit mano ba ai bor ïaka JMB ban leit bret ïaki ñiut haka shnong Myntriang.

Ula ïathuh ba haka jingtohkit la lap ba la donkti da uwei u riew rangbah jong shnong uba kyrteng u Wolling Lamurong bad une u riew rangbah ula phla namar ba u ïajan paralok bad u Sniawbhalang Dhar bad ruh bad u F War Chairman JMB kumta ula ailad ban bret ñuit shipor ha jaka jong u.

U Ma Channel Lamurong dkhot Shnong ula ïathuh ba ka Dorbar Shnong haka jingshong dorbar ka la rai ban sospon ïa u Wolling Lamurong na ka kam ba u bat kum u Secretary Managing Committee jong ka Dorbar Shnong namar ka jingïaid lait jong u ïaka Dorbar Shnong.

Kumban shu pynkynmaw ba haka 9 tarik une u bnai ka Jowai Municipal Board kala lum ia ki ñiut na Jowai, pynban haka sngi kaba bud ki ñiut kila dap biang ha Iawmusiang. Haka Sngi Nyngkong la lap ba la don ruh kiba thang iaki ñiut kiba lum thup ha Thomas Jones Syndon College, kaba long pyrshah ïaka hukum jong ka National Green Tribunal bad ka Solid Waste Management Rules 2016 kaba khang pyrshah ban thang ia ki ñiut ki nier ha ki jaka paidbah.