Phah notis ka Lokayukta sha ki 10 ngut ki ophisar Sorkar barim bad MeECL halor ka jyrsieh Saubhagya scheme

Syllad | The Rising MeghalayaJune 28, 2024

Ka Meghalaya Lokayukta ha ka 27 tarik mynta u bnai ka la phah da ka notis (Notice) sha ki shiphew ngut ki heh sorkar barim bad sha ka Tnat Meghalaya Energy Corporation Limited (MeECL) halor ka jingmudui kam bamsap ha ka jingpyntreikam ia ka Saubhagya scheme.

Ia kane ka jingujor la mudui pyrshah da u MLA ka Voice of the People Party (VPP) ka North Shillong u Bah Adelbert Nongrum ha ka 12 tarik mynta u bnai.

Kane ka jingmudi ka long pyrshah ia u Chief Secretary barim, Additional Chief Secretary barim (Power), Chairman cum Managing Director (CMD) ka MeECL bad ki Heh ophisar ka MePDCL kaba kynthhup ia u Director (Distribution), Chief Engineer (Distribution), Chief Engineer (Rural Electrification), Company Secretary, Chief Accounts Officer/Deputy Chief Accounts Officer, Additional Chief Engineer (Material Management) bad Additional Chief Engineer (Planning & Design), kata da kaba pynshong nongrim katkum ka kaiphot jong jong ka Comptroller and Auditor General of India on Social and Economic Sectors jong u snem ba kut jong ka 31 tarik Lber 2022.

Ha ka hukum ba la pynmih da u Chairperson, Meghalaya Lokayukta u Bah B Dhar ha ka 27 tarik Jylliew la ong, “La dep ban iohi ia ka jingujor kaba 12 tarik Jylliew ba la ujor hapoh ka kyndon 13 (1) (a) jong ka Prevention of Corruption Act, 1988, da u Bah Adelbert Nongrum. Phah ia ka notis sha baroh kiba shah ujor kumba la kdew kyrteng bad suhlang ha ryngkat ka copy jong ka jingujor.”

Nalor kata la bthah ruh, “Namar ka jingkynnoh katkum ka jingmudui ka dei kaba la pynshong nongrim katkum na ka kaiphot jng ka Comptroller and Auditor General of India (CAG) ia kaba la mudui sha ka Meghalaya Legislative Assembly, phah ia ka notis bad ka copy jong ka shithi sha u Commissioner and Secretary, Meghalaya Legislative Assembly.”

Nalor kata ka hukum kala bthah ban buh ia ka 23 tarik Naitung ha ka por 2 baje janmiet ban shong bishar halor ka nongrim jong kane ka ujor.