Phah pahara ka bor district ha ki Pulit iaka shnong Lapangap ong ka JSU

Syllad | The Rising MeghalayaAugust 24, 2023

Ka Jaintia Students’ Union (JSU) haka jingialam u general secretary u Treiborlang R Suchen ryngkat bad ki dkhot kila hiar sha Lapangap, ka shnong ha khappud hadien ka jingkynad hapdeng u Karbi bad Pnar iing trep sha ki jaka rep haka sngi Palei.

Ka Dorbar Shnong Lapangap hapoh West Jaintia Hills District pynlong biang iaka jingthung iaki tynrai dieng kiba la shah pynjulor ha ki Karbi ha u Lum Moo Pyrdet Pynthor, Lapangap.

Haka jingiakren bad ki lad pathai khubor, u waheh Shnong u Deimonmi Lyngdoh ula ong ba ka dorbar Shnong ka la rai bad thung da ki tynrai dieng kseh ha utei u lum khnang ban pynskhem ia ka jinglong trai halor ki jaka ki pura kiba hap hapoh u tei lum.

Kumban shu iathuh ba dangshen haka 18 tarik Nailar ki paid Karbi kila wan ban pynjulor iaki tynrai dieng kiba la ai da Meghalaya Basin Development Authority (MBDA), West Jaintia Hills lyngba Japan International Cooperation Agency (JICA).

Ula ong ba katba ki nongshong Shnong ki dang muja ban thung ia kitei ki tynrai dieng kseh bad hadien katto katne por la sakhi ba la mih ka tdem na ka thain Karbi.

Ula iathuh katei ka tdem kaba mih na ka thain Karbi ym lah ban tip la kadei ka iing ne ka iingtrep, hynrei ki Karbi pat ki kynnoh ba la thang da ki nongshong Shnong ka Lapangap.

Ula ong kane ka jingkynnoh jong ki Karbi kadei ka jingkynnoh lamler bad buit sianti jong ki.

Ula iathuh ba na ka liang ki Karbi la wan da ki pulit Assam bad na ka liang ka Lapangap la don ki pulit ka Saitsama Police Outpost ban ai jingiada iaki.

Ka JSU ruh kaba la hiar sha ka Lapangap kala kyntu iaka bor synshar district ba pynbiang pahara da kaba buh noh shisyndon iaka Polcie Border Outpost hapoh u pud u sam ka shnong Lapangap ban iada iaki nongshong shnong ka Jylla.

U Treiborlang, ula iathuh ba naka liang u bor distrik ki la mynjur ban phah iaki pulit sha kine ki jaka iakynad naduh lashai ka sngi bad na liang ka shnong Lapangap ki la pdiang iakane ka jingai buit bad ka jindawa ka JSU.

Ka JSU kala ban biang bad kala maham tyngeh iaki katto katne ngut ki nongpynshit jaitbynriew na Karbi ki ba wanrah ia ka jingiakynad hapdeng ki Karbi bad ki Khasi-Jaintia haki jaka khappud Assam Meghalaya.