Phah shim admission ka Kiang Nangbah Govt College Students’ Union ia u ma Sniawbhalang Dhar ban sngewthuh iaka jingeh ki samla pule

Syllad | The Rising MeghalayaJuly 24, 2023

Ka seng ki samla pule ka Kiang Nangbah Government College Students’ Union (KNGCSU) kala ther tyngeh ia u Deputy Chief Minister ka sorkar Jylla u ma Sniawbhalang Dhar uba sngewkhia iaka jingeh ka Kiang Nangbah Government College (KNGC) tang ha rynsan paidbah. Ka KNGCSU kala kyntu ruh ia u ban shim admission ha Kiang Nangbah Government College ban sngewthuh iaka jingeh.

Ki nongialam ka KNGC Students’ Union kila ong ia kane haba kynthoh iaka jingkren u ma Sniawbhalang Dhar haka jingalang pynkut iaka iaka lyngkhuh snem ba 10 ka Ummulong Presbyterian College haka 21 tarik Naitung ba ki samla pule kiba leit klas ha Kiang Nangbah ka long kumba ki leit iew bad ym ikop ba ki leit klas namar ba jur ka jingkhapngiah.

Kane ka jingkren jong u kala pynshrai iaki samla pule ka Kiang Nangbah Government College Students’ Union namar ba ka kam jong u bad ka jingkren jong u kam iadei haei eiei bad kam don kano kano ka roi ka par ha kane ka koleg sorkar kaba rim tam ha rilum Jaintia.

“Haba ngi sngap bha iaka jingkren jong u ba u kynthoh ba ki samla pule kiba leit klas ha Kiang Nangbah ka long kumba leit iew bad ym i kop kum kiba leit klas. Ngi kwah ban pyngsngew ba kane ka kolej sorkar kaba rim tam ha rilum Jaintia, hyrnei ka jingkren jong u ban pynpaw iaka jingsngewkhia iaka kolej kam iahap satia haei haei bad ka kam jong u bad kane ka ka kolej ka dei kaba shah leh bein haka sorkar. Naka por shaka por ngi buh iaka dorkhat kaba ym lah shuh ban niew sha ka sorkar ban pynbiang iaka jingdonkam ka kolej, hynrei haduh mynta mynne kam shym la don kano kano ka roi ka par ha kane ka kolej,” la ong u Precioustar Sten president KNGCSU.

Ka Union kala ong shuh shuh ba ba haka por pynrung klas, ki ktah khlieh namar ba bun palat ki samla pule ba duh klas bad kiba bun hi kiba rung klas ha kane ka kolej dei kiba thep klas tang ha kane ka kolej bad kam don kano kano ka jingshna iaki kamra klas ban pynjem iaka jingeh ki samla pule.

“Ngi sngew sarong ba ngi ioh Dy CM na Rilum Jaintia, hynrei ki kam bad ki jingkren jong u haba nujor, ka dei ka por ia u ban rung klas ha Kiang Nangbah Govt College ban sngewthuh iaka jingeh ki samla pule,” la ong u Precioustar Sten.

Ka KNGC Students’ Union haba kyntu ia u Sniawbhalang Dhar Symbud Myntri Rangbah ka Jylla, kala ong ba um dei ban kren pyllait lyer tang ha ki rynsan paidbah, bad kyntu ia u ban kyndang iaki file bad ki jingdawa kaba la buh wat naka bor pyniaid ka kolej naka bynta ka jingdonkam ka kolej.