Phah shna biang ka HYC iaka surok Nartiang Jonglwit Barato ba torti siang rong

Syllad | The Rising MeghalayaMarch 18, 2021

Ka Hynñiewtrep Youth Council (HYC) Elaka Shilliangmyntang Area Unit kala dawa naka PWD (Rds) Shangpung Division ban shna pynbha iaka surok Nartiang Jonglwit Barato, kaba la paw tynkrein bala trei torti ia kane ka surok.

Kane ka surok Nartiang-Jonglwit-Barato ka jrong15 KM bad la pyntrei lyngba ka Central Road Fund, (CRF) ha u snem 2019 ha ka jinglut kaba T.89,80,000.

Ki nongialam bad ki dkhot jong ka HYC, Elaka Shilliangmyntang Area Unit haka jingleit jurip ia kane ka surok haka sngi Balang haka jingiadonlang ki engineer PWD (Rds) Shangpung Division kumjuh u kontrak u Victor Suja kila pynpaw ka jingbym hun halor ka jingshna ia kane ka surok.

“Kane ka surok ka dei kaba la dep siang rong tang hapoh 1 snem, hynrei namar ka jingstang palat ka rong kala paw biang ki maw bad kiba bun ki bynta jong kane ka surok kala jot bad pra,” la ong ki nongialam ka HYC kiba kynthup ia u president Pynroi Shylla bad publicity secretary Kularskhem Sariang.

U Executive Engineer PWD Shangpung Division, Bah E Lyngdoh ula ong ba ia kane ka surok dei ban siang ne ka Blacktopping 20 cm bad ka jingheh ka surok ka long 3.75 Metres.

Ka HYC kala kynnoh ba haka jingjurip kiba bun ki bynta jong ka surok kala jot namar ka jingstang palat ka rukom siang rong.

“Kane ka thaiñ ka dei kawei naki thaiñ kaba sahdien tam bad kila ioh ia kane ka surok dei hadien kumba 30-35 snem kumta lada ka PWD kam pynshna bha ia kane ka surok kin ia kynduh shibun ki jingeh khamtam haka pang ka shitom bad ka kamai ka jih nalor ba kane ka thaiñ ka don jngai na ki jaka sor kiba don ki iew ki hat kumjuh ruh ki jaka ai jingsumar,” la ong u Pynroi bad banjur iaka PWD Shangpung Division ban shna biang ia kane ka surok katkum ka rukom bad lad aka PWD ka leh bymsuidniew kin shim da kiwei ki lad ki lynti.