Phah tohkit u Dy CM halor ka jingkynnoh pyndait ksew ki pulit ia u briew ha PS Dawki

Syllad | The Rising MeghalayaJune 14, 2024

U Symbud Myntri Rangbah ka Jylla uba khmih ia ka Tnat kam Pohiing u Bah Prestone Tynsong ha ka 13 tarik Jylliew u la hukum ia u Superintendent of Police ka West Jaintia Hills ba un pynlong ka jingtohkit halor ka jingkynnoh kem bad pynshitom bein da kaba phah dait ruh da u ksew ia uwei u nongshong shnong ka thain Pyrdiwah, East Khasi Hills hapoh Dawki Police Station, West Jaintia Hills.

Haba kren sha ki lad pathai khubor hadien ka jingiakynduh ia u Dy CM ban phah tuklar halor katei ka jingjia, u President ka Seng National People’s Youth Front (NPYF) u Bah Kitboklang Nongrem u la ong ba na ka liang une u Myntri u la hukum ia u SP ka WJH ba u dei ban pynlong mardor ia ka jingtohkit halor katei ka jingkynnoh pyndait ksew jong ki pulit ia utei u riew rangbah.

U Nongrem u pyntip ba ha ka 12 tarik mynta u bnai, uwei u nongshong shnong ka Pyrdiwah, EKH u la shah kem noh ha kaba la wanlam ia u shapoh Dawki police station hadien ba katto katne ki pulit ki la kynshu da u ksew ba un dait ia u kaba la pynlong ia une u briew ba un ngat ha ka jingmynsaw.

U Nongrem u la kynnoh ba une u briew u la shah kem noh halor ka jingsuba ba u dei u nong Bangladesh.

“Ngi sngewthuh ba ki pulit ki lah ban kem iano iano lada ki don kano kano ka jingsuba leh kam bymman, hynrei ka long ka jingleh tohmet bad ka bym lah ban pdiang ba ki pulit kin pynshitom bein ia u suba bad ban phah dait syndon ia u da u ksew hapoh ka police station,” ong u Nongrem.

Nalor kata u Bah Nongrem u la ong ba kum u nongialam ka kynhun ki la kyntu jur ia u Symbud Myntri Rangbah ba un phah pynlong da ka jingtohkit kaba bniah khnang ban lap ia ki jingshisha baroh halor katei ka jingjia, bad ruh ban pynshitom pyrshah ia kito ki pulit kiba donkti ha kaba pynshitom bein ia utei u rangbah.

“Ngi la pynsngew ruh sha une u Symbud Myntri Rangbah ba un shimkhia lem ha kaba iadei bad ki jingshah pyndik ba khah khah jong ki paidbah ka thain khappud ha ki shipai BSF ia kaba u Myntri u la kular ha ngi ba ka sorkar Jylla ka la iatreilang bad ki BSF kumjuh bad ka tnat pulit ban pynthikna ba kan don ka jingiadei kaba jan hapdeng ki BSF bad ki nongshong shnong ki thain khappud,” u la bynrap.