Phah tuklar ka JNC ia u CEM ka JHADC ba kyntait ki bank ban ithuh ia ki syrnot ka Council

Syllad | The Rising MeghalayaApril 17, 2025

Ka Jaintia National Council (JNC) Western Zone ha ka 16 tarik Iaiong ka la kyrpad ia ka jingtuklar lem jong u Chief Executive Member (CEM) ka JHADC u Bah Thombor Shiwat halor ka jingkyntait jong ki bank ban ithuh ia ki kot ki sla ba la ai da ka District Council.

Katkum ka dorkhas ba la ai sha u CEM la kdew ba ka jingkyntait jong ki Bank ban ithuh ia ki kot ki sla ba la ioh na ka District Council ka la buh jingeh shibun ia ki trai jaka kumjuh ia ki nongshong shnong hapoh ka district.

Ka seng ka la kdew ba ka JHADC ba la pynkupbor da ka Sixth Schedule jong ka Riti Synshar ka ri India ka la ai ia ki kot ki sla kiba donkam kum ki kot bat khyndew ne Land Holding Certificates (LHC), Patta, No Objection Certificates (NOC) bad Non-Encumbrance Certificates.

Hynrei, ki bank ki la bteng ban kyntait ne ban pdiang ia kine ki kot ki sla kaba pyni ba ki Bank kim khein snep ia ka bor jong ka JHADC bad kaba wanrah jingeh shibun ia ki trai jaka kiba thmu ban shim ram na ki Bank.

“Ka jingmih na kane ka jingbym ithuh da ki bank ia ki kot ki sla jong ka Council ka la wanrah shibun ki jingeh kum ha kaba shim ram na ki Bank, bad ka jingeh ha ki kam pisa ban pynrung kyrteng ia ki jaka ha u Registrar/Registering Officer. Kane ka jinglong jingman ym tang ba ka buh jingkylli ia ka jingioh bor jong ka District Council hynrei ka buh jingeh halor ka jinglongtrai ia ka khyndew ka shyiap lyngba ki kot ki sla (LHC) ba la ai da ka JHADC,” ong ka JNC ha u kyrwoh.

Kumta ka JNC ka kyrpad jur ia u CEM ba un shimkhia mardor ban pynbeit ia kane ka kam. “Ngi kyntu ia ka ophis ban bthah ia ki Bank ba ki dei ban ithuh bad pdiang ia ki kot ki sla khyndew ba la ai da ka JHADC bad ban pyrkhat ban ai da ka certificate ba kyrpang ban pynsuk ha ka ban ai ia ka jingithuh,” ong u kyrwoh.

Nalor kata ka JNC ka la ban jur ba kino kino ki bank kiba pyrshang ban kyntait ia ki kot ki sla ba la ai da ka JHADC ki dei ban pynkhreh ban mad ia ki jingeh.

Halor kane ka phang, ka seng ka la ong ba na ka liang u CEM u la pynthikna ban shimkhia mardor halor kane ka phang.