Phah tuklar ka NEHUSU, KSU iaka kynhun Myntri ka Jylla ban weng ia u Prof Shukla kum u VC ka NEHU

Syllad | The Rising MeghalayaApril 2, 2025

Ka North-Eastern Hill University Students’ Union (NEHUSU) ha ryngkat ka Khasi Students’ Union (KSU) NEHU Unit ki la kyntu ia ka jingtuklar lem jong ka kynhun Myntri ka Jylla na ka bynta ban phah weng noh mardor ia u Vice Chancellor ka skulbah NEHU u Prof Prabha Shankar Shukla.

Ia ka dorkhas halor kane ka phang la aiti sha ki Myntri Sorkar kaba kynthup ia ka Kong Ampareen Lyngdoh bad u Bah AL Hek ha ka 1 tarik Iaiong.

“Ryngkat lang ngi la aiti ia ka dorkhas ban kyrpad ia ka jingtuklar lem ba mardor ban pynbeit ia ki rukom treikam bad ki jingeh hapoh ka skulbah North Eastern Hill University (NEHU). Ngi kyrpad jur ia ka jingkyrshan ka jong phi ban pynbeit ia ki kynrum kynram bad ki jingeh kiba ktah ia ki samla pule, ki nonghikai bad ki nongtrei ia kaba ym shym la don ba shimkhia mynta la bun bun bnai,” ong kine ki artylli ki seng samla pule.

Ka dorkhas ka la ong ruh ba baroh kiba don bynta bad ka NEHU ki la bteng ban pynlong ia ki jingiakhih pyrshah ia u Prof PS Shukla namar ka jingpulom ka jong u ban pyniaid ia ki kam ki jam bad halor ka jingkynnoh pyndonkam bakla ia ka bor ban pyniaid ia ka skulbah. Halor kine ki jingeh, ka NEHUSU bad ka KSU NEHU Unit ki la pynlong da ka jingiakhih shah thngan ha ka 5 tarik u Naiwieng 2024. Hadien la pynsangeh noh ia ka jingiakhih hadien ba la ioh ia ka jingkular na ka Ministry ka Sorkar Pdeng na ka bynta ban leh ia kaba donkam. Hadien kane ka la pynmih ia ka hukum ha ka 14 tarik Naiwieng 2024, ha kaba ka Ministry ka la thung ia ka Inquiry Committee ba kan pynlong ia ka jingtohkit halor kitei ki jingkynnoh. Ha ka jingwan jurip jong katei ka Committee ia ka NEHU, kitei ki kynhun ki la aiti ia ki kot ki sla bad ia ki sakhi satar ban kyrshan halor ki jingkynnoh ki jong ki.

Nalor kata, katkum ka shithi na u Chairman ka Inquiry Committee kaba 28 tarik Naiwieng 2024, ka bor ba dei khmih ka la pynjlan sa 15 sngi na ka bynta ban ai ia ka rai kaba khatduh halor ki jingshem jong ka bad ban aiti ia ka kaiphod. Hynrei, wat hadien ba katei ka jingwan jngoh jong ka Committe, hynrei kam shym la don satia kano kano ka jingpyntip lane ban leh ei ei halor kane ka bynta da kaba bteng ban shu ieh ia kane ka jinglong jingman jong ka skulbah ha ka umdum.

“Da kaba shim halor ka jinglong jingman kaba sngewkhia shibun bad kaba la ktah jur halor ka rukom pyniaid ia ka pule puthi bad ki kam ki jam hapoh kane ka skulbah, ngi ai ka jingshaniah ka jong ngi ha ka jingialam ka jong phi ban shim ia ki sienjam khnang ban lah ban pynbit noh ia ki kynrum kynram bad ia ki mat jingdawa, ” pynpaw ka kynhun ki samla pule.

Nalor kata ka la ong ruh, “Ngi kyntu jur ia phi ban iasaid na ka bynta ban weng noh mardor ia u Prof Shukla kum u VC ka NEHU ha ryngkat kiwei pat ki ophisar ki bym larkam khnang ban pynthikna ia ka rukom pyniaid kam kaba beit, kaba khuid ba suba na ka bynta ka lawei ba phyrnai jong ka skulbah. Ka jingtuklar ba mardor jong phi bad ka jingai jingkyrshan kan long ka jingiarap na ka bynta ban pynneh pynsah biang ia ka jinglong jingman bad ka kyrdan ba bha jong kane ka skulbah NEHU. Ngi kyrmen skhem ba phin shimkhia ban pyniaid shakhmat ia kane ka kam bad ieng ha ryngkat ki samla pule ha ka jingiakhun ban pynioh ia ka hok bad ka jingkylla.”