Phah weng kam ka CAG ia ki 82 ngut ki nongtrei KHADC ba iaid lait ia ka policy thungkam

Syllad | The Rising MeghalayaJanuary 7, 2025

Ka Comptroller and Auditor General of India (CAG) ka la bthah ia ka Khasi Hills Autonomous District Council (KHADC) ba kan weng kam noh ia ki 82 ngut ki nongtrei namar ka jingthung kam kaba iaid lait ia ka policy thungkam thungjam.

“Ka jingbym bud ryntih ia ka policy thungkam ka la plielad plie lynti sha ka jingthungkam kaba noh shiliang bad kaba shu jied briew. Khnang ban ym don ka jingleh shiliang ha ka thungkam thungjam, ka Council ka dei ban bud ryntih ia ki kyndon thungkam. Kine ki jingthungkam kiba long pyrshah ia ka Rule jong ka Council hi ki dei ban khein iap ne pynduh pyndam noh,” ong ka CAG ha ka kaiphod kut snem jong ka 31 tarik Lber 2019.

Katkum ka The KHADC Service Rules, 1961 ka don ka jingtuh kyndon ha kaba iadei bad ka jingthungkam bad ka jingkyntiew kyrdan ia ki nongtrei jong ka KHADC.

Ka Rule 3 ka kdew shai kdar ba ka jingthungkam ha baroh ki kyrdan jong ki nongtrei ka dei ban long hadien ka jingpynbna laitkam bad ka jingpynlong ia ki eksam lane interview.

Ka jingbishar bniah ia ki rekod ki pynpaw ba ka KHADC ka la pynrung kam ia ki 82 ngut ki nongtrei (permanent) ha ki kyrdan bapher bapher. Hynrei la shem ba kine ki 82 tylli ki kam kiba lait ki dei ki bym shym la pynbna paidbah. Ia ka jingthungkam la leh tang da ka jingmynjur jong ka Executive Committee khlem da pynlong ia kino kino ki eksam ne interview, ong ka kaiphod.

Ka KHADC ka la hap ban pynlut haduh T.1.06 klur hapdeng u snem 2017-19 na ka bynta ka jingsiew ia ka tulop bad kiwei pat ki jingsiew sha kine ki nongtrei.

Hynrei ki daw ban thung ïa ki nongtrei khlem da pynlong ïa kano kano ka eksamin ne interview ban ïakhun bad ka jingdon jong ki kam ba la mynjur bad ka kynhun ne cadre kim shym la don ha ka rekod ne la ai ban leh audit, la ong ka kaiphod.

U Secretary ka Executive Council KHADC ha u Nailar 2022, u la pynpaw ba katkum ki kyndon ha ka Sub-Rule IV jong ka Rule 2 jong ka Chapter -1 jong ka KHADC Service Rules, 1961,, ka “Appointing Authority’ lane ka bor thungkam kaba ka Executive Committee lane kano kano ka bor ba la aibor da ka EC ban thungkam ha kino kino kam ne kyrdan katkum ka jinglong jingman.

Nalor kata, ka Sub-Rule XI jong ka Rule 2 jong ka Chapter-I jong kane ka Rule ka ong ba ka Committee kaba mut ka Executive Committee jong ka District Council ka United Khasi Jaintia Hills.

Ka Rule 12 jong ka Chapter III jong ka Rule ba la kdew ka ong ba ‘baroh ki jingthungkam ha ki kam jong ka Council, ki kyrdan class III bad IV yn leh da ki bor ba la kdew ha kata ka bynta da ka hukum ba kyllum jong ka Committee.

Da kaba pynshong nongrim halor kitei ki Rule ba la kdew, ka jingthungkam ia ki 82 ngut ki nongtrei ha ki kyrdan bapher bapher, kum ki Sub Inspector Tax, JAA bad kiwei pat la leh da ka jingmynjur jong ka Executive Committee, KHADC katkum ki kam kiba lait.

Nalor kata ka jubab jong ka KHADC kaba la aiti ha u bnai Risaw 2023 ka la pyni ba na ki 66 ngut ki nongtrei ba la thung hapdeng u snem 2018-19 tang 8 ngut la thung halor ka nongrim jong ka compassionate ground katba hynniew ngut ki nongtrei la thung pyrshah ia ka jingshongthait ba khlem pat dei por jong ki kmie ki kpa bad kiwei pat ki nongtrei la thung khlem da pynlong ia kino kino ki eksam.

Ka CAG watla katta ka la ong ba ka jubab jong ka Council ka dei ka bym lah satia ban pdiang namar ba ka Rule 3 jong ka Chapter -III jong ka General Rule kaba teh kyndon ia ka jingthungkam bad ka jingkyntiew kyrdan ka ong ba ka jingthungkam ha baroh ki kyrdan (lait noh ka Compassionate ground) invalid pension case dei ban leh hadien ka jingpynbna laitkam bad da kaba pynlong ia ka eksam bad interview.