Phaikhmat ka sorkar Meghalaya sha kiwei pat ki thain na ka bynta ka lynti rel

Syllad | The Rising MeghalayaSeptember 15, 2023

U Myntri Rangbah ka jylla u Conrad K Sangma mynta ka sngi Thohdieng u la ong ba ka sorkar jylla ka la phaikhmat sha kiwei pat ki thain jong ka jylla ha kaba iadei bad ka jingthmu ban wanrah ia ka lynti rel.

Haba kren sha ki lad pathai khubor, u Sangma u la ong ba ka jingpynpaw da ki briew jong ka tnat Northeast Frontier Railway (NFR) ka long kaba shisha ba kam mih satia kano kano ka jingkylli na ka bynta ban pynduh noh ia ka lynti rel lane ban shu pyntrei jubor ia ka.

U la ong ba ka projek kaba nyngkong hapoh Khasi Hills ka la mad ia ki katto katne ki jingeh ha kaba iadei bad kane ka jingthmu, bad na ka liang ka sorkar ka donkam ban  shim ia ki sienjam ban ia pynbeit halor kine bad kaba lah ruh ban shim por.

Ia mynta hi u Conrad u la ong ba ka la don katto katne ka mangtyngka kaba thmu na ka bynta kane ka projek hynrei namar kam shym la khih, na ka liang ka sorkar India kan sa buh jingkylli haduh katno kan bat sah ia ka pisa.Kumta u la ong ba kin pynphai noh ne pynkynriah noh ia ka projek sha kiwei pat ki bynta jong ka jylla bad ban pyrshang ban pyndonkam ia kane ka pisa khnang ba kan ym sepei, kata da kaba pyrshang ban wad lynti sha kiwei pat ki thain jong ka jylla kiba kloi ban pdiang khnang ba yn lah ban sdang noh ia kane ka projek lynti rel.

Nalor kata u CM u la ong ba u la dep ban pynpaw ruh ia kane kajuh ka jingsngew sha u Myntri ka tnat ka Sorkar Pdeng bad na ka liang une u Myntri ula pynpaw ha u  ba u kloi ban pdiang ia kane ka jingtyrwa ka jong u.Kumta ruh u la ong ba kin hap ban bishar na kane ka liang bad peit lada don kiwei ki project kiba ki lah ban pyniaid shakhmat bad lada don khnang ba kan ym long ka jingduhnong ia ka jylla haba phai sha ka liang ka pisa namar ka pisa kala poi na ka bynta ki katto katne ki kam kiba iadei bad ka lynti rel.

Halor ka jingkylli kaba iadei bad ka jingpyntreikam ia ka ILP ha ka jylla, u CM u la ong ba ka ILP ka dei ka sienjam ka ban iarap ban tehlakam ia ka jingwan rung kyrthep ki mynder, hynrei ki don pat ruh da kiwei pat ki lad ki lynti kiba lah ban pyntreikam halor kine ki jingsngewkhia jong kiba bun balang.

“Ka jingsngewkhia kam dei satia ka ILP, ka jingsngewkhia ka dei ka jingwan rung beain jong ki briew kiba na shabar bad na ka liang ki paidbah ki sngew ba ka ILP lane katto kagtne ki kynhun ki sngew ba ka ILP ka lah ban iarap ban weng ia kine ki jingeh,” u la ong.

Hynrei nalor kane ka sienjam ki don pat kiwei pat ki lad ki lynti bad dei na kane ka daw ngi la wanrah da ka MRRSA lem bad kiwei pat ki lad ki lynti. “Kumta ngi sngew ba ka jingiakren kan dang iaid bad ngin pyrshang katba lah ban weng ia kine ki jingeh,” ong shuh shuh u CM ka jylla.