Phiel ki khynnah ba pep skul u nonghikai shi snem lynter

Syllad | The Rising MeghalayaAugust 11, 2019

JOWAI: Ki khynnah skul jong kawei ka skul ha Rilum Jaiñtia kila phiel lut tang namar ba pep skul u nonghikai skul la shi snem lynter.

Kane ka jingpep skul une u nonghikai ka jia ha ka skul Government Upper Primary School, Barato bad baroh ki khynnah skul kila phiel lut haka sobjek History bad Geography kiba dei ki ar tylli ki sobjek jong une u nonghikai u dei ban hikai.

Une u nonghikai ba pep skul u dei uba kyrteng Palwan Dkhar uba na ka shnong Pynthorlangteiñ, West Jaiñtia Hills.

La kynnoh ba ki khynnah kim shym la ïoh ban ïakhun ïaka sobjek jong une u nonghikai haka eksamin shiteng snem namar ba ym don ba pynkhreh ïaki jingkylli ba kin thoh eksam.

Kaba phylla la kynnoh ba ka tnad Pule Puthi jong ka West Jaiñtia Hills kala ïoh jingtip halor kane jingpep skul une u nonghikai, hynrei kala leh bymsuidniew bad buh jingeh kylla ïaki bor pyniaid ka skul bad ki khynnah skul.

Kane ka jingpep skul une u nonghikai kala paw pyrthei haka jingialang jong ki kmie ki kpa bad ki bor pyniaid skul kaba long haka 9 tarik u Nailar shuwa ban sam resol shiteng snem sha ki khynnah skul.

Kane ka Upper Primary School kadei kaba la kyntiew kyrdan sha ka Secondary School (RMSA), hynrei kane kyrdan secondary skul ruh ka ïakynduh jingeh ban pynïaid ïaka skul namar ba ka duna nonghikai.

Ïa kane ka jingpep skul une u nonghikai la ïakren ha katei ka jingialang kaba pynïaid da u Hermon Buam Incharge Headmaster, haka jingadonlang u MDC ka thain Barato Mukhroh u Aiborlang Shadap, ki nongïalam shnong naduh u secretary shnong Harvest Shadap, chairman shnong Brolsingh Talang, Darling Dkhar, secretary shnong barim bad ki kmie ki kpa jong ki khynnah skul.

U MDC ka thain Barato Mukroh u Ma Aiborlang Shadap ula pynpaw ka jingbynñiaw kaba khraw halor kane ka jingpep skul une u nonghikai bad ula dawa na ka tnad Pule Puthi ban pynbiang da uwei u nonghikai khnang ba kan nym thud ka pule ka puthi jong ki khynnah skul katei ka skul.

U Aiborlang Shadap, ula ong ba kane ka skul ka ïakynduh jingeh kaba khraw namar ka jingduna nonghikai haka kyrdan Upper Primary. Ka tnad pule puthi hadien ba kala pynkynriah iaki ar ngut ki nonghikai ba kynthup ïa u nonghikai HIndi sha Jowai bad Mynso haduh mynta la jan dap ar snem kam shym la thung da kiwei.

Shuh shuh ula ong ba ki nonghikai ka Secondary School Barato (RMSA) kila pynpaw ba ki duna nonghikai bad ki shem jingeh bha ban sam jingnang jingstad sha ki khynnah. Kila pynpaw ba haka sobjek English bad ka Khasi ym don nonghikai wat hadien ba ka tnad pule puthi kala kular ban thung nonghikai ha katei ka skul.