Phiel treikam ka UBI Bank Nongbah ba sniew ki kor ki bor la 7 bnai

Syllad | The Rising MeghalayaJuly 10, 2020

Ka rukom treikam jong ka United Bank of India, Nongbah Branch kala phiel namar ba thud ki kor ki bor bad ka internet mynta la 7 bnai kynthih.

Kane ka jingbym biang ka jingai jingshakri ka United Bank of India, Nongbah Branch kala pynsngewsih iaki paidbah nongshong shnong ka Nongbah kiba shaniah ha katei ka bank na ka bynta ka kam kynshew pisa, sei pisa bad kiwei kiwei ki lad ban ioh jingiarap na ka bank.

“La 7 bnai mynta kane ka bank kam lah ban ai jingshakri bad kiba bun ki paidbah kila pynpaw ka jingbynniaw namar tang ban kyntiew iaka jingkhien ne ka pisa kaba la thep haka passbook ruh kim lah satia,” la ong u Ma Lakhon Biam MDC ka thain ula la iakynduh iaki nongtrei ka bank mynta ka sngi Thohdieng.

Haka jingleit u MDC ka thain ha katei ka bank ula lap ba don tang ar ngut ki nongtrei ka bank bad um shym la iohlad ban iakynduh bad u manager ka bank.

Kane ka bank ka ai jingshakri ia ki palat 10 hajar ngut ki briew kynthup iaka shnong Nongbah bad ki shnong ba marjan, hynrei kane ka jingthud ki kor ka bor ka bank kala buh jingeh iaki paidbah khamtam ki nongbylla 100 sngi bad kiba shaniah ha ki skhim sorkar.

“Ngan shimkhia ban peit kumno ka jingtreikam kane ka bank bad lada kam lah ban pynbeit ngan ujor sha ki bor ba halor ka bank, khnang ba ki paidbah ka thain kin nym shah ktah,” ong u ma Lakhon Biam bad ula bynrap ba kiba ki paidbah kiba shaniah ban kynshew pisa ha kane ka bank bad kiwei kiwei ki jingdonkam kila hap ban hiar sha Jowai ban pyndep iaki kam ki jam ha bank.