Phin jied ia u ban ai papor ne vitamin: Lahkmen

Syllad | The Rising MeghalayaFebruary 17, 2023

U Ma Lahkmen Rymbui haka jingialang ialap elekshon jong u ban pan biang iaka jingkyrshan u paidbah ban mihkhmat iaka Amlarem Assembly Constituency sha iing dorbar thawain ka Jyla, ula kylli ia u paidbah ka thain Amlarem hato kin jied ia uba ai da u Papor ne kin jied da uba ai da ka Vitamin na ka bynta 5 snem ban wan.

Ia kane u ma Lahkmen ula ong haka jingialang paidbah kaba long ha shnong Mustem haka miet sngi Palei.

Ula ong ba “ka NPP kadei ka party kaba bha tangba ha Amlarem Constituency ka dei ka ‘Nong Kynnoh People’s Party”.

U Ma Rymbui ula kyntu iaki paidbah ba haba jied ïa u nongmihkhmat dei ban pyrkhat sani bha uba kumno u nongmihkhmat kin phah sha ka ïing dorbar thawaiñ ka Jylla ban ïasaid na bynta ka khia ka shon jong ki paidbah ka constituency.

Kane ka election kadei ka election ban pyrkhat na bynta ka roi ka par, namar ba la jyllei ki nongpynbiej kiba long kum ki ‘suit tyngjang’ ki bym juh ïohi pyrthei kiba mih tang haka por election ban wan pynbiej ia phi ki paidbah haki ïing ki sem jong phi, la ong u Ma Lahkmen.

Ula Ma Rymbui ula ong wat shah thied haki company u Prakash kiba pynbiej ïa phi da u papor uba sahkut tang haki tyngkhap bniat. Ula bynrap ba um donkam ïaki nong sponsor ne ki nongsynniang ban iakhun iaka elekshon bad ki paidbah hi kidei ki nong sponsor jong u.

U Ma Lahkmen ula ther tyngeh ruh ïaki nongkynthoh pyrshah ïa u kiba ju kynnoh ba u khlem leh eiei ha kine ki 5 snem ba la dep.

Ula ong wat la kiwei ki kynnoh kynthoh hynrei ka jingshisha hi ka roi ka par ka paw haki shnong ki thaw hapoh ka constituency naduh ki skul, ki surok, ka umbam umdih, ka jingkyntiew kyrdan ïaki jaka ai jingsumar bad kiwei kiwei ki kam pynroi.

Ula ther tyngeh ruh ïa u Ma RL Tariang uba la kynnoh ba u Lahkmen Rymbui udei u Panah jong ka UDP bad ula ong lada u Lahkmen udei u Panah jong ka UDP, u RL. Tariang udei u briew uba khlem akor uba ïeh beiñ ïaka UDP namar ba kadei ka party duk.

Ngi ruh ngi nang ban kynnoh hynrei ym sngew donkam ban kynthoh kynnoh, ngin pyni da ka kam namar ka kam ka kren khamjam ban ïaka ktien, la ong u Ma Rymbui.

Ula pynshai ruh ha kaba ïadei bad ka skhim MLA kaba kot 11 klur 50 lak ym kum ka jingkynnoh jong u D Tariang lyngba ka RTI kaba 12 klur 50 lak tyngka. Ula pynshai ba ïa kane ka skhim ha u snem 2018-19 la pynlut kumba 2 klur tyngka, 2019-2020 la pynlut 2 klur, 2020-21 la pynlut 2 klur shiteng, 2022-23 la pynlut 2 klur shiteng bad la thied Ambulance ruh na bynta ka Synjuk Waheh shnong War Jaintia kumba 5 lak tyngka.

Shuh shuh haka jingïadei bad ka jingkynnoh ba la pynjah klep ïaka pisa Covid kumba 5 lak shiteng bad ula pynshai ba la sam mar 5 hajar tyngka sha ki 20 tylli ki Covid Management Committee nalor kiwei kiwei ki jingdonkam jong ki paidbah bad ka Constituency.