Phooh ka lehkmen Lyngkhooh Snem Rupa ka Seiñ Kur Shadap Manar ha Barato

Syllad | The Rising MeghalayaDecember 29, 2023

Ka Seiñ Kur Shadap Manar (Central Body) kawa da jooh pynman ya ka Dorbar Kur Shadap Manar kawa chisien chi snem ha ki chnong waphær waphær hapoh ka Ri-loom Jaiñtia wei ha uni u snem ka kur da pynman ko ya ka Dorbar Kur ha ka chnong Barato heiwa da lehkmen ya ka lyngkhooh snem wa 25 næ ka Silver Jubilee ka Kur.

Ya kani ka lehkmen da pynman ha ka 27 tarik uni u bnai hapoh i yahkhmat u President ka Kur u Herlington Shadap Manar ha u MLA ka Mowkaiaw, u Nujorki Sungoh da man u kam u kongsan katwa u MDC ka thaaiñ, u Aiborlang Shadap da man u kam u symbood kongsan uwa man leh u dkhot kur.

Ha kani ka sngi da emlang ka Rimaya S. Manar, kawa man ka Director of DERT, u Pastor Banker Shadap, u Pastor Callme Manar, u Officer in Charge ka Jowai Police Station u Sunday Manner wa kiwi kiwi ki sahep sorkar.

Da yoh ya ki kyntien pdiang sñiawbha na u Pastor Banker Shadap ryngkat i rwai pdiang burom na ka Seiñ Kur Shadap Manar Barato Unit, wei da pyllait paidbah leh ya ka kot sahkynmoo namo ka Souvenir Silver Jubilee yong ka Seiñ Kur da uwa ebuit ka kur, u Borin Shadap.

Ha kani ka sngi u General Secretary ka Seiñkur u Goldwin Shadap da khana u ya ka parom ka kur wei da ekti u leh ya ka dorkhat ha u kongsan wow paan yarap wow chna ya ka Museum ha chnong Barato kawa man ka chnong yong ka Syiem Latympang.

Neiliang u Nujorki Sungoh da kular u wow yarap ya ka Seiñkur wei wow yarap katwa joh i bor u wow chna ya ka Museum yong ka Seiñkur Shadap Manar.

Chooh chooh ha kani ka sngi da pynkup burom leh ya kiwa sdang ya ka Seiñkur wei da pynphooh leh ya kani ka sngi da ki chaad wa ki Unit Kur waphær waphær kam na ka Iooksi Unit, Mowkaiaw Unit, Jowai Riwar Unit, Shanai wa kiwi wa dla pynkhreh na ki chnat ka Seiñkur na kylleiñ.