Phra tylli ki Takma Ksiar ioh khur ki khynnah Kickboxing ka MAKO na Dehradun

Syllad | The Rising MeghalayaOctober 6, 2023

Ki khynnah ialehkai Kickboxing ka Meghalaya Association of Kickboxing Organisation (MAKO) hapoh ka lama ka Meghalaya School of Martial Arts (MSMA) sa shisien pat ki la ioh ia ka jingjop ha ka jingiakop National Kickboxing kaba la long da Dehradun, Uttarakhand da kaba ioh ban khur haduh 8 tylli ki takma Ksiar.

Ka Seng ha u kyrwoh lyngba u Publicity Secretary ka pynpaw ba kane ka jingjop ka la wan long hapoh ka jingialam jong u nongseng jong ka Kick Boxing ha Meghalaya u Bah Donny Ranee bad i Kong Bajoplin Kharmudai kum i Team Manager bad kaba la long shisha ka burom na ka bynta ka jylla Meghalaya hi baroh kawei.

Ia kane ka jingiakop National Kickboxing la pynlong hapoh Multipurpose Sports Hall, Parade Ground, Dehradun, Uttarakhand da ka Uttarakhand Kickboxing Association hapoh ka lama jong ka National Kickboxing Federation (NKF-NG) kaba kaba la ioh ia ka jingithuh da ka Asian Kickboxing Confederation.

Ki medal ba la ioh khur da ki 20 ngut ki khynnah ialehkai ka MAKO  ha kane ka lympung  naduh ki Sub-Junior, Junior bad Senior ki long baroh 29 tylli. Kiba la ioh ia ka Takma Ksiar ne Gold Medal ki long baroh 8 tylli, Takma Rupa ne Silver Medal14 tylli bad Takma Rnong ne Bronze 7 tylli