Phuh mut phuh mat ki nongrep Pynthor Nein, ioh bai lutksan na PWD hadien ba julor ki hali naka jingshna surok Jowai Bypass

Syllad | The Rising MeghalayaDecember 17, 2024

Ki nongrep jong ka Pynthor Nein kila phuh mut phuh mat hadien ba kila ioh iaka bai lutksan na ka tnad PWD namar ka jingshah pynjulor ki hali hator jong ki naka jingtuid ki maw ki shyiap na ka jingshna iaka surok Jowai Bypass na Treiongriang sha Khliehtyrshi.

Ki nongrep kiba shah ktah ki don haduh 11 ngut, ki la noh mynsiem hadien shah tap ki hali jong ki ha ki maw ki shyiap ha kane ka aiom lyuir lyngba ka wahduid kaba la tip kum ka Liar Pamkam.

Hynrei ka khubor kaba lam sngewtynnad bad ai jingkyrmen biang iaki nongrep ban ioh rep mynta ka aiom hadien ba ka PWD kala rai ban siew iaka bai lutksan nalor ban pynkhuid iaki maw ki shyiap kiba la tap iaki hali hator jong ki.

Ki engineer ka tnad PWD haka 16 tarik Nohprah kila hiar sha katei ka jaka rep ban jurip iaka jingpynkhuid iaki hali kaba iadonlang bad ki nongrep ba shah ktah. La iadonlang u Bah H. Nengnong, Executive Engineer Jowai Central Division, u Ma O Thubru, Assistant Executive Engineer PWD NH Sub-Division Jowai, u Ma S. Challam, Junior Engineer NH Sub-Division Jowai bad Ma A. Lipon, Sectional Assistant NH Sub Division Jowai.

U Assistant Executive Engineer PWD NH Sub-Division Jowai Ma O Thubru haba kren sha ki lad pathai khubor ula ong, ka tnad naduh ba jia kane ka jingjia iaki nongrep kala pyrshang ban iakren na ka bynta ban pynkhuid bad siew bai lutksan bad na kaliang ki nongrep ruh kila mynjur ia kane ka jingtyrwa.

Ula ong ba ka jingpynkhuid iaka Liar Pamkam la sdang shibnai mynshwa, hynrei hapdeng ka jingpynkhuid kala don ka jingbym ia sngewthuh jingmut hapdeng u waheh shnong ka Khliehtyrshi bad nongrep kumjuh ki trai jaka bad la hap ban pynsangeh noh shipor iaka jingpynkhuid bad hadien ba la poi shaka jingsngewthuh jingmut ka jingpynkhuid kala sdang biang.

Ula pyntip ruh ba ka PWD ryngkat ka Dhar Construction Company kaba pyntrei ia kane ka surok kila pyrshang ban wad ki lad ki lynti katba kot la ka bor ban pynioh jingiarap iaki nongrep bad ka jingiarap kan bteng haki aiom slap ban wan lada jia biang kane ka jingjia.

Ki nongrep kynthup u Ma Kam Pakynteiñ, ka Kong Middle Pakynteiñ nalor kiwei ki pynpaw ka jingsngewnguh sngewburom iaka tnad PWD kaba la shimkhia ban pynioh ki lad jingiarap sha ki 11 ngut ki trai jaka kiba la mad na ka jingshah ktah bad kila pyntip ruh ba halor ki jingiarap kila dep ban iasoi soskular bad ka tnad PWD da kaba khmih lynti ba kum kine ki jingshah ktah kin nym jia shuh haki sngi ki aiom ba wan khnang ba kin ioh ban rep ban ot man la u snem.