Phuh phieng Chad Tyllu ki khun ka Seinraij Mynso

Syllad | The Rising MeghalayaApril 8, 2023

Ka Lehniam Chad Tyllu kadei kawei na ki lehniam jong ki khun ka shnong Mynso ba la hikai ryngkat ka niam ka rukom bad ka shat ka kmen hashwa ban sdang bet sdang thung hapoh ka shnong Mynso.

Ha une u snem ïa kane ka Lehniam la pyndep haka 7 tarik Iaiong ha kaba ki khun ka Seinraij Mynso kiba dang skhem ka jingngeit haka niam ba la hikai ki longshwa manshwa ki la wan ban ïa shimbynta hapdeng ka riam ka beit ba iphuh iphieng bad ishongkun shongkhia.

Ha kane ka sngi ïa kane ka leh niam la wan sakhi pynshongshit ruh da u Dolloi Elaka Jowai Puramon Kynjing bad kiwei kiba shah khot sngewbha.

Shwa ban sdang ki khun samla jong ka Seinraij Mynso ban mih shad, ka la don shwa ka jingïalang lyngkot ba la pynïaid da u Pynhunmi Chen, General Secretary Seinraij Mynso katba u Kynmoo Situng ula ai ki kyntien nguhblei nguhsyiem.

U Dolloi ka Elaka Mynso Karmi Myrchiang ula ai ki kyntien waiphang, u Washington Shylla, Adviser SRJ-Mynso ula iathuh shaphang ka nongrim jong ka lehniam Chad Tyllu katba kiwei ki waheh kiba la ai jingkren mynsiem ki long u Moonlight Ktung, President SKN-12 Dolloi, u Chanlok Dkhar, Vice-Chairman NTC-Seinraij, u Nitajen Manner, Vice-President Seinraij Shangpung.

Haba kut ka jingïalang kawei ka longkmie jong ka Seinraij Mynso ka Synshar Passah ka la ai ki kyntien sngewnguh.

Katkum ka jingiathuh u Washington la ong ba ka nongrim jong kane ka lehniam ka long ban ainguh ïa u blei trai kynrad kamjuh iaka ka blai Tyllu hashwa ban sdang ka rep ka riang ka thung ka tep khnang ban ioh ki khun ka shnong ka raij iaki jingkyrkhu kyrdoh bad ban miat ban bha ka rep ka riang ka thung ka tep.