Phuh phieng ka jingleh niam Durga Puja ha Nartiang

Syllad | The Rising MeghalayaOctober 23, 2023

Ka lehniam Durga Puja ha ka shnong Nartiang, West Jaintia Hills District, ka jaka kaba la niew kyntang da ki riew ngeit Hindu kaba la tip kum ka Nartiang Shakti Peeth kala long kaba shongkun bad kaba iphuh iphein kaba la wan ban iashimbynta da spah ngut na kylleng ka District bad kumjuh nabar ka Jylla haka sngi pomblang kaba long haka 23 tarik Risaw.

Kane ka lehniam Durga Puja kan kut lashai ka sngi (24/10/23) ha Nartiang da ka jingleit bret ia ka Dur Blei Durga ha ka wah Myntang kaba don hajan ka Durga Temple, ka Temple kaba la rim tam ia kaba la ngeit bala tei da u Syiem Jaintiapur.

Ha Nartiang, ka jinglehniam ka long kaba khampher haba ia nujor bad kiwei pat, namar ba ha kane ka shnong ia ka blei la shna da ka pachor ym kum ha kiwei ki jaka da ka dew byrtha.

Ka shnong Nartiang, kaba jngai tang kumba 25 Km na ka Jowai kadei maka na ki na ki shnong jong ka Jaidbynriew Khasi-Pnar, kaba lehkmen ia ka lehniam puja naduh ki por hyndai hynthai kaba la leh ruh da u Syiem Jaintia .

Haba sdang ka lehniam naduh kine ki khyndiat sngi ki paidbah riewngeit niamtynre ne niam tynrai ka shnong Nartiang ki la bunkam ban pynkhreh ia kane ka lehniam ba shisien shi snem. Ki Ksing ki dhah ki la riew kylleng ka Nartiang khamtam ha kito ki kyntoit kiba bat iaka niam tynrai.

Ha kane ka jinglehniam la pynlong iaki jingknia jingkhriam bapher bapher bala pyndep da ki Wamon ne Pandit. Ia ka lehniam Puja ha ka Nartiang la pyllut pynsep bad la pynkreh da u Dolloi ka Nartiang da ka jingiarap ki dkhot ka Puja Committee.

La sakhi haka 23 tarik Risaw, ki paidbah na kylleng ki wanrah iala ki jong ki blang, ki paro, ki kait, ki jhur ki jhep bad kiwei kiwei ki kynja jingbam ban ai burom sha ka blei Durga.

U Dalloi ka Nartiang, u wan rah ar tylli ki blang, uwei na ka bynta u syiem bad uwei pat dei na ka bynta ka Elaka Nartiang, uba long u blang uba kyrpang bad la pom ia ha ka por shiteng synia bad ka por ba pom ia une u blang dei tang u pandit uba lah don shapoh ka temple bad ula khang khop iaka temple namar bym bit ia kiwei pat ban peit haka miet 22 tarik.

La shai ka sngi 24/10/23, hashuwa ban leit bret iaka blei sha wah Myntang kan don ka jinglehniam ha Temple bad ka jingshad Mastieh kaban iashimbynta da u Dalloi bad ki nongbud jong u bad kiwei kiwei.