Phuh phieng ka Shad Suk Mynsiem kaba nyngkong eh ka Seng Khasi Raid Laban

Syllad | The Rising MeghalayaFebruary 10, 2025

Ki shong ki thaw bad ki dong ba hap hapoh ka Riat Laban Dorbar Pyllun, ha kine ki ar sngi kiba la dep kata ha ka 8 bad ka 9 tarik u Rymphang 2025, ka da dap shisha da ka mynsiem kaba kmen kaba sngwtynnad katno tam lei lei haba ka sur jong ka ksing ka bom ka nakra bad ka tang muri, ki saw jam ha ki sur ki hynniew kit, namar ba ha ka sien kaba nyngkong, ki nongialam ka Seng Khasi Raid Laban, ki la shim ia ka sien jam ban pynsah nam pateng la pakit, da ka jingpynlong ka jong ki ia ka shad suk mynsiem kaba nyngkong ha madan jong ka skul Shillong Vidyalaya, kaba don ha Lum Shatsngi.

Ha ka sngi kaba sdang jong kane ka shad, ki parakur ki parakha ba bat ba ksoh ha la ka jong ka niam tynrai, na ki dong bad ki kyntoit jong ka Lumparing bad Lumsohphoh, kaba hangne khrui ryngkat ki nongshad shynrang bad ki 12 ngut ki samla, ki la rah ia la ki lama ha la ka kti ban sdang ia ka jingiaid lynti ban leit sha ka lympung shad.

Ynda haba la poi ha lympung shad, ka la don ka nguh ka dem ka shat ka khein ka khnong ka bishar, kaba la wan ban pyndep ia ka da u Riew Tymmen U Riew San ka Seng Khasi Kmie, u Rgh Skor Jala, hadien kane, u Rgh I Sun u la shim ia ka bynta ban kyntiew ia ka lama jong ka seng bad hadien kane la ioh pat ia ka shad nohkjat.

Haka sngi kaba ar, ka lympung shad ka la dap bad shlei hi smam da ki nongshad shynrang bad kynthei kiba ym duna ia ka saw spah tam, kiba la iahsim bynta sit rhem, kaba da pyniphuh iphieng bd ba shongkun shisha ban peit.

Ki riew pawkhmat kiba la wan ban ia ai mynsiem bad pynshngain lem iaka sngi ba kut jong kane ka shad ka long u MLA ka South Shillong u bah Sanbor Shullai, ki dkhot ka jylla pyrkhat kam ka Seng Khasi Kmie, President bad ki Secretary jong ki tnat seng khasi ka bri Hynñiewtrep, ki Rangbah nongialam jong ki jait niam bapher bapher ba don ha u pud u sam jong Ka Riat Laban Dorbar Pyllun, khlem da klet ia u paid byllein ban sakhi dem pynleit jingmut ia ki sur jong ka ksing ka bom ka tangmuri bad ka rukom ban shad pyniahap da ki rang bad ki thei sotti.

Shwa ban pynkut ia kane ka shad ka kmen, ka Seng Khai Ri Raid Laban ka la sam ruh ia I jingai sngewbha sah jingkynmaw ia man la ki nongshad kiba la wan ban iashim bynta.

Ia kane ka shad ka kmen, la ioh pat ban pynkut da ka jingdwai kaba la ai a u riew tymmen riew san ka Seng Khasi Ri Raij Laban u Rgh Donbokstar Kurkalang bad pynhiar ia ka lama da u Rgh I. Sun.