Plei u MLA Jowai iaka painkhana paidbah ka Kiang Nangbah Stadium

Syllad | The Rising MeghalayaJanuary 14, 2025

U MLA ka Jowai bad Chairman MUDA Ma Wailadmiki Shylla ula plie iaka painkhana paidbah ne public toilet ha Kiang Nangbah Stadium kaba la tei lyngba ka jingiatreilang ka Rotary Club Jowai, West Jaintia District Sports Association ryngkat u MLA ka Jowai Constituency lyngba ka skhim jong ka Jowai Municipal Board kaba hap hapoh ka 15th Finance Commission Award jong u snem 2020-21 (Tied–Grant).

Lah ban kdew ba iaka jingtei la buh maw nongrim haka 22 tarik Lber 2022 bad la plie paidbah iaka haka 14 tarik Kyllalyngkot kata ha shwa ka jingpynlong iaka 6th Meghalaya Games ha Jowai-Wahiajer, West Jaintia Hills District.

U Ma Wailadmiki Shylla kum u kongsan ula ong, kano kano ka jingtei jingshna kam don ka jingeh bad ka jingeh kadei hadien ba la dep ka jingtei namar ym don nongpeit nongsumar sukher bad kyntu ruh iaka Rotary Club Jowai kumjuh ka West Jaintia District Sports Association ban shimkhia ban leh ia kaba donkam na ka bynta ka jingmyntoi ki paidbah.

Shwa kane u Working President WJDSA Ma EMH Passah ula pynpaw ka jingsngewnguh iaka Rotary Club Jowai kumjuh ia u MLA namar ka jingdon iaki Public Toilet kan pynsuk iaki paidbah kiba wan ha Kiang Nangbah Stadium na bynta ki jingiakop bapher bapher.

Iaka jingialang la pyniaid da u Rtn. Rudolf E Laloo, President Rotary Club Jowai uba la iathuh iaki kam ka Rotary Club Jowai na ka bynta ka bha ka miat ka imlang sahlang jong ki nongshong shnong ka Ri Jaintia.

Nalor u MLA la donlang ruh u Superintendent of Police, West Jaintia Hills District Ma Chemphang Syrti, u DSO West Jaintia Hills District Ma Khroobok Passah, u Rtn Barnabas Nangbah, ki nongialam bad dkhot nongkitkam ka WJDSA kynthup naduh u General Secretary Ma Lammat-oo Laloo, Vice President Ma Patrick Lamare, Football Secretary Ma Nangebormi Sutiang, kumjuh ki dkhot ka Rotary Club Jowai nalor kiwei kiwei.

Kiwei de kiba la ai jingkren ki long u Rtn. SK Lato Vice-President, Rtn. G. Pradeep Pillai, Asst Governor Zone 13, u Rtn. Mewothi Gatphoh, u Rtn. DF Majaw bad Rtn. Samehi Laloo.

Kum ka dak ka jngnsgew burom iaki dkhot kiba la iarap kylluid mynsiem na bynta ka Public Toilet, ka Rotary Club Jowai kala ai da ki Certificate of Appreciation bad la pynshong shit iaka jingialang da ki sur jingrwai na u Lorenzo bad Rikdup Laloo.