Plie biang ka High Court iaka Krangshuri naka bynta ki nongwan jngohkai, hukum kynriah ia kiba iakhih

Syllad | The Rising MeghalayaSeptember 12, 2024

Ka ïingbishar High Court ka Meghalaya ka la hukum ia ki nongshong shnong / ki nongiakhih pyrshah ha ka jaka jngohkai jong ka kshaid Krangshuri (Krangshuri Waterfall) kaba don ha ka thain Amlarem Sub Division, West Jaintia Hills ba kin kynriah noh mardor na kine ki jaka lane mad ia ka jingshah shim bishar namar ka jingpynkhein ia ka hukum ka iingbishar.

Ia kane ka hukum la pynmih da ka Iingbishar High Court ka Meghalaya hadien ka jingshim bishar ia ka mukotduma WP (C) 286 of 2024 ba la ujor da u Raij Buam pyrshah ia ka Jylla Meghalaya bad kiwei kiwei.

Ha kane ka jingbishar, la pyntip ba ka jingialang ba la khot pynlong da u Deputy Commissioner, West Jaintia Hills District ha ka 2 tarik Nailur ban iakren halor ka jingthmu ban pyniaid ia ki jaka jngohkai pyrthei ha Krangshuri, Amlarem da ka District Tourism Promotion Society, (DTPS) ha kaba la pynmih ruh ia ka SOP ban pyntreikam shipor tad haduh ban da lah ban pynbeit ia ka jingiakynad hapdeng ki kynhun kiba don ha ka jingiakajia.

Katkum ka SOP ban pyniaid ia ki jaka jngohkai ha Krangshuri Falls, ia ka jingpeit bad jingpyniaid baroh kawei yn leh da ka District Tourism Promotion Society (DTPS)ha kaba u Nodal Officer un long u District Tourism Officer.

Yn buh ia ki jingthoh kiba iadei bad ki jingpyntip ha ki jaka rung ba la kdew ia baroh ki jingsiew bad ki kyndon. Yn pyni ruh ia ki phone number jong u OC, Amlarem lada jia ba don kino kino ki nongjngohkai pyrthei kiba shah pynsangeh ha kino kino ki briew ne kynhun.

Ia ki signboard ba la buh da ki nongiakhih kaba ong ba la khang ia ka Krangsuri yn weng noh. Ka Bank Account ba kyrpang na ka bynta ka Krangshuri yn plie da ka District Tourism Promotion Society (DTPS). Baroh ki jingsiew yn lum lyngba ka UPI kaba bha ban pyniasoh bad ka bank account ka jingkhein jong ka District Tourism Promotion.

Kine harum ki dor jong ka bai rung bad ka jingdonkam ki nongtrei:

Sl.No	Role	Staff Needed	Wages
1.	At Counter	2	Wages as per the Notification from the Labour department
2.	Life Guards	4
3.	Parking Lot	2
4.	Boatmen	2
5.	Watchmen	4 (two in waterfalls) &(two in the Parking area)