Plie iaka Skill Training Programme ha Diengshynrum

Syllad | The Rising MeghalayaJuly 2, 2024

Ka Mihmyntdu Community Social Welfare Association (MCSWA) ha ka 1 tarik Naitung ka la pynlong ia ka jingialang plie ia ka ‘Skill Training Programme’ na ka bynta ka General Duty Assistant bad Home Health Aide ha ka prokram ba la pynlong ha DMF Building Diengshynrum, Khliehriat East Jaintia Hills District ha kaba la wan iashim bynta da ka Additional Deputy Commissioner, East Jaintia Hills, Khliehriat ka Kong JU Kharpuri bad u District Medical & Health Officer, East Jaintia Hills District, Khliehriat u Dr D Shylla.

Haba aijingkren ha ka jingialang kum ka Kongsan ka Kong Kharpuri ka la pynpaw ka jingsngewnguh ia ka Mihmyntdu Community Social Welfare Association (MCSWA) halor ka jinglah ban pynlong ia kaba kum kane ka prokram aijinghikai ka ban pynmyntoi shibun ia ki samla jong ka District hi baroh kawei.

Haba pynpaw halor ki Skill Training Programme ba la pynlong hapoh jong ka Skill Meghalaya, ka la kdew ruh halor ki jingthmu jong ka sorkar na ka bynta ban plielad ha ka liang ka iohkam ioh jam sha ki samla ka jylla kiba la pyndep ia ki jinghikai halor ka phang kaba iadei bad ka koit ka khiah.

Haba kren halor ka jingduna ha ka liang ki lad ioh kam ioh jam hapoh ka jylla, ka Kong Kharpuri ka la kyntu ia ki nongioh jinghikai bad ia ki kmie ki kpa kiba wan iashim bynta ha ka jingialang ba kin long kiba iar jingmut da kaba ai ruh ia ki kyntien pynshlur ia ki kmie ki kpa jong kine ki samla ba ioh jinghikai ba kin ailad ia la ki jong ki khun ba kin trei wat shabar ka jylla. Ka la ong ruh ba ka jingleit trei shabar ka jylla bad wat shabar jong ka ri ym tang ba ka plielad ha ka liang ka ioh kam ioh jam hynrei kan nangkyntiew ruh ia ki sap ki phong ki jong ki.

Katba na ka liang u Dr. D Shylla ha ka jingkren ula ban halor ka jingdonkam ia ka Skill Training na ka bynta ki lad ioh kam ioh jam hapdeng ki samla, kata da kaba pynshlur ruh ia ki samla ba ki dei ban shim ia ka kabu namar kane kan plielad ha ka liang ka ioh kam ioh jam ha ki sngi ki snem ki ban wan.

Kiwei pat kiba la aijingkren ha kane ka prokram ki kynthup ruh ia u Chief Functionary MCSWA, u Bah AJ Nongkynrih, Skill Development Officer, EJHD u Bah L Suchen bad Skills Manager Programme MCSWA, Kong Patlong.