Plie iaki jaka sain dop kwai ha Umkiang ka ban pynmih nong haduh 1 klur shi snem
Kan long kawei na ki lad ai kam ai jam haka shnong Umkiang, hadien bala lah ban plie syndon iaki 5 tylli ki Areca Nut Processing Unit ne ki jaka sain ne shna iaki dop kwai kum ia ki pliang, ki khuri ki bol (Bowl) bad ki shamoid nalor kiwei kiba iadei bad ka mariang namar ba ka dop kwai ka dei tang ka sla pyut jong u dieng kwai.
Ia kine ki jaka sain dop kwai la plie paidbah da ka MLA ka Sutnga Saipung, ka kong Santa Mary Shylla haka 2 tarik Rymphang haka jingiadonlang u Additional Deputy Commissioner, East Jaintia Hills Bah Gautam Warjri, District Project Manager, DPMU (Megha-LAMP) u Bah Hunlang Ioo Blah, ki nongialam shnong, ki dkhot bad nongialam ka Umkiang IVCS ki ban peit bad pyniaid ia kine ki Arecanut Processing Unit
Ia kane ka Arecanut Processing Unit la bei pisa pura da ka Meghalaya Basin Management Agency (MBMA) lyngba ka District Project Management Unit (Megha-LAMP), East Jaintia Hills District kaba la sdang da ka bor pyniaid district jong ka East Jaintia Hills.
La iathuh ba kine ki 5 tylli ki kor kin wanrah iaka lad kamai kajih bad ioh kam ioh jam haduh 200 tylli ki longing bad kan pynmih iaka jingioh noh kumba 1 klur haka shisnem. Ia kine ki mar ba pynmih na kine ki unit la pynbeit bad kawei ka kynhun kaba na Assam ban pyniaid iew ia kine ki mar bad lada jop kane ka kam ka bor district kan seng ha baroh kawei ka East Jaintia Hills District.
Ka kong Santa Mary Shylla haba kren kala pyrto ia u Deputy Commissioner, East Jaintia Hills Abhilash Baranwal, IAS uba la shim iaka sienjam ban sdang ia kine ki kharkana sain dop kwai. Kala ai khublei ruh iaki dkhot ka Umkiang IVCS ki ban long trai bad nongkhmih ia kine ka processing unit ba kin shimkhia iaka kam bad trei shitom na ka bynta ban pyniaid shakhmat iaka kam khnang ba kin lah ban ieng hala ki jong ki kjat.
Ha kajuh ka por ka kong Santa kala pynshlur ia ki nongshong shnong khamtam ia ki samla ban shim ia kane ka kum ka lad kamai jakpoh bad kyntu ruh iaki samla ban shimkabu liaka scheme CM-Elevate bad kiwei kiwei ha ka ban seng ia ki kam lajong.
La ioh ruh iaka jingkren na u Arindam Dasgupta, CEO jong ka Tamul Plate Marketing Private Limited, Barpeta Assam. Ula on gong ba kine ki sla dieng kwai ki shu sepei bad hap ha madan, hynrei da ka jingdon kane ka unit bad da ka jingiatreilang bad ka MBMA bad ka Umkiang IVCS yn shna iaki pliang, ki bowl bad ki shamoid ban kyntiew iaka ioh ka kot ka shnong Umkiang
Ia ka jingialang plie paidbah la pyniaid da u Raplem Pohduna, Secretary Umkiang IVCS, ia ki kyntien pdiang sngewbha la ai da u Bah Lasting Pala, Waheh Shnong Umkiang bad ia ki kyntien ai khublei la ioh na u Bah Stanly Lamin, Chairman Umkiang IVCS.
Facebook
Instagram
Youtube
Twitter
Leave a Reply