Plie jaka kunai symbai ka SURE ha Mulum

Syllad | The Rising MeghalayaSeptember 30, 2019

JOWAI: Ka North East Slow Food and Agrobiodiversity Society ha ryngkat ka jingïatreilang ki Seng Treimon sngewbha kum ka Society for Urban and Rural Empowerment bad ka North East Network Nagaland, mynta ka sngi 30 tarik u Nailar la plie ïa ka jaka kunai symbai lane Community Seed Bank haka shnong Mulum West Jaiñtia Hills.

Kane ka long kum shi bynta jong ka project ‘no one shall be left behind’ kaba hapoh ka North East Slow Food and Agrobiodiversity Society.

Ka jingthmu jong kane ka jingbuh ïa ka jaka kaban long kum u thiar ban lum, kynshew bad kunai symbai ka long ban pynneh pynsah ïa ki symbai tynrai kiba na kine ki lum jong ngi hi.

Ïa kane jaka kunai symbai la seng da ka kynhun Participatory Guarantee System kaba la tip kum ka Ïaraplang Local group bad ïa kane ka jaka kynshew symbai la tip kum ka Ïaraplang Community Seed Bank, Mulum Laskeiñ Development Block, West Jaiñtia Hills.

Ka kong Hamsniawpher Suchiang kaba long ka nongïalam jong kane ka kynhun haba batai shaphang ka jingsdang jong kane ka jaka kynshew symbai ka, kala ïathuh ba mynshuwa kala don kaba kum kane ka jingkynshew symbai ha kine ki thaiñ kaba la kyrshan da ka District Basin Development Unit West Jaiñtia Hills, hynrei kata kala kut noh, hynrei mynta kane ka kynhun hadien ba kila ïoh jingpynshai na ki nongtrei jong ka SURE shaphang kane ka projek kila rai ban sdang thymmai ïa kata ka jingkynshew bad kunai symbai.

Haka jingkren jong u kum u kongsan, u ma A Malang uba long Horticulture Development Officer hapoh ka Laskeiñ Develpoment Block, ula ong ba ka jingwan jong ki symbai thymmai ka dei naka bynta ban kyntiew ïaka rep ka riang bad ban pynkiew ïaka ïoh ka kot jong ki nongrep. Hynrei ula kyntu ruh haka juh ka por ïa ki nongrep bad kim dei ban klet ïa ki symbai tynrai ne ki symbai kiba ngi la ïoh pateng na ki kmie bad ki kpa tymmen jong ngi.

U Ma Malang ula ong ruh ba ka long kaba donkam ban tyngkai bad kunai ïa ki symbai tynrai khnang ba ka lawei jong ki nongrep kan long kaba shngaiñ. Ula ong ruh ba kane ka jaka kunai symbai tynrai ka lah ruh ban long shisha kum ka bank kaba ki nongrep na kiwei pat ki jaka kin wan ban thied symbai bad kan long ka lad kamai ïa kane ka kynhun.

U HH Mohrmen uba la pynïaid ïaka jingïalang ban plie ïa kane ka Community Seed Bank ula ong ba nalor ban pynneh pynsah ïa ki symbai tynrai, kane ka projek ka ïaleh ruh ban hikai bad pynshlur ïa ki nongkyndong bad khamtam ki nongrep ban bam da jingbam kiba dei teimet kiba lah ban ïoh na ki kper bad kumjuh ki jhur khlaw kiba lah ban ïoh na ki sawdong sawkun.  Lyngba kane ka projek la kyntu ruh ïa ki midday meal cook bad kumjuh ki Anganwadi ban pyndonkam ruh ïa ki jhur khlaw khnang ban pynïoh ïa ki khynnah ïa ka jingbam ba tei met.

U ma Rolin District Mission Manager jong ka Meghalaya State Rural Livelihood Society ula kyntu ïa kane ka kynhun ba kane kaba kila sdang kam dei ban kut tang hadien bala kut ka projek, hynrei ba nang pynbha bad pynroi ïa kane ka kam wat hadien ba kane ka projek kan ku ruh. Ha kane ka jingïalang la ïoh ruh ïaka jingbatai shaphang ki kam jong ka SURE ha kane ka shnong da ka Daka Bareh kaba long ka field coordinator jong ka SURE. Kiwei pat kiba ka kren ha kane ka jingïalam ki dei u ma Nira Suchiang Assistant Waheh Chnong ka shnong Mulum bad ka kong Revian Suchiang kala tyrwa ïa ka jingkren ai khublei.