Plie ka Civil Hospital Nongpoh ia ka jaka sumar ia ki khunlung ba dang kha

Syllad | The Rising MeghalayaMay 3, 2024

Ban kyntiew shuh shuh ia ki lad aijingsumar ka Civil Hospital Nongpoh ha ka 1 tarik mynta u bnai ka la ioh ban plie sa ia ka jaka sumar ba kyrpang na ka bynta ki khunlung kiba dang shu kha ia kaba la tip kum ka Special Care New Born Unit (SNCU).

Ka jingioh ia kane ka jaka sumar ba kyrpang na ka bynta ki khunlung ba dang kha bad kiba don ia ki jingshitom bapher bapher kan pynmyntoi shikatdei ia ki nongshong shnong ka thain Ri Bhoi District khamtam kito ki kmie ki kpa kiba ioh ia ki khunlung kiba don ia ki jait jingpang jingshitom bapher bapher.

Na ka liang u  Dr. HB Buam, paediatric bad Incharge ka SNCU, u la iathuh, ba ki bor ba dei khmih ka Nongpoh Civil Hospital, ki la don ka jingthmu ban pyntreikam ia kane ka SNCU mynta la katto katne snem bad dei tad haduh mynta u snem 2024 ba kila lah ban pynurlong ia kane ka jingthmu.

Nalor kata u la ong ruh ba kane ka jaka sumar ba kyrpang ka long na ka bynta ki khunlung ba dang shu kha kiba don kum ia ka jingpang stem, ki bym iam bad kiwei kiwei ki jait jingshitom.

U la ong ruh ba kane kan pynsuk shibun ia ki kmie ki kpa namar mynshwa la hap ban phah ne pynkynriah ia kiba kum kine ki khunlung ba don jingshitom sha Bethany hospital ne sha Shillong, kaba buh jingeh khamtam ia ki longiing kiba duna ha ka liang ka ioh ka kot, hynrei mynta ki la ioh ia ka lad jingsumar ka bym donkam lut ei ei ruh.