Plie ka ICAR ia ka guest house ha ka kyrteng u Tirot Sing u khlawait ka ri

Syllad | The Rising MeghalayaAugust 17, 2023

Ha ka sngi rakhe ia ka sngi laitluid kaba 77 jong ka ri India ha ka 15 tarik mynta u bnai, u  Director jong ka Institute u Dr VK Mishra hadien ka jingpynher ia ka lama ka ri u la ai nam ai burom ia ka guest house ba la shna pynbha jong ka Institute ha ka kyrteng jong u Khlawait ka ri u Tirot Sing.

Haba kren ha kane ka prokram ha ka jingiadon lang ruh ki Scientist, ki bor pyniaid, ki nonghikai bad ki staff jong ka Institute u Director u la ai ka jingiaroh ia ki riewshlur jong ka ri kiba la aiti iala ka jong ka jingim ban pynioh ia ka jinglaitluid, kaba la pynlong ruh ba ngin ioh ia kum kane ka lad ban ialehkmen ha kane ka sngi.

U la pynpaw ruh ba baroh ki nongtrei jong ka Institute ki dei ban ieit bad sngewtynnad iala kaj ong ka jaka trei namar ka la ailad ia ki ba kin im hapdeng ka jingsuk bad la ki jong kiba haiing hasem, bad kaba pyni ruh ba kane ka jingburom ia la ka kam kadei ka jingburom ia ka ri hi baroh kawei.

U Dr Mishra u la pynpaw ruh ba u Tirot Sing Syiem u dei u riewialeh laitluid, namar ka thma Anglo-Khasi War ka dei ka bynta jong ka jingialeh laitluid hapdeng ki jaidbynriew Khasi bad ka sorkar phareng (British) ha ki snem 1829-1833.

Nalor kata u la ong ruh ba ka por ka la dei eh ban pyniasoh ia ka jingnoh synniang jong une u khlawait ka ri hapoh ka  “AmritKaalMahotsav” jong ka ri India.Da kaba ai kyrteng thymmai ia kane ka jaka shong jong ki scientist kum ‘U Tirot Sing’ Guest House’ kan pynioh jingmyntoi shibun ia ki nongwan jngohkai kiba wan na kylleng ka ri kiba wanjngoh ia kane ka Institute, bad ki jingbuh rekod ba khyndiat halor ki jingtip kiba iadei bad u Tirot Sing ha kane ka sngi kan long ka tyllong aijingtip na ka bynta kiba bun ki briew ki bym pat tip shaphang ki kam shlur jong u Tirot Sing.